काठमाडौं, वैशाख ९ । निर्वाचन आयोगले प्रतिनिधिसभा सदस्यको उपनिर्वाचनको व्यवस्थापन चुस्तदुरुस्त बनाउन सम्बन्धित निकायलाई निर्देशन दिएको छ । चितवन–२, बारा–१ र तनहुँ–१ मा भोलि वैशाख १० गते उपनिर्वाचन हुँदैछ ।
निर्वाचनलाई स्वतन्त्र, भयरहित र निष्पक्ष रुपमा सम्पन्न गर्न आयोगले निर्देशन दिएको हो । जिल्लामा रहेका अस्पताल, नर्सिङ होमलगायत सबै स्वास्थ्य संस्था सञ्चालन गर्ने र एम्बुलेन्स र दमकललाई स्ट्यान्डबाइ राख्ने व्यवस्था मिलाउन माग गरेको छ ।
त्यसैगरी सुरक्षा निकाय र सञ्चार सेवा प्रदायक कम्पनीलाई पनि निर्वाचनका बेला आफ्ना सेवा प्रभावकारी र सहज बनाउन आग्रह गरिएको छ ।
उपनिर्वाचन स्थलमा खटिएका कर्मचारी र सुरक्षाकर्मीलाई कसैले धम्की दिएमा र काममा बाधा पुर्याए तत्काल कारबाही गर्न आयोगले निर्देशन दिएको छ । निर्वाचनका लागि खटिएका कर्मचारी र सुरक्षाकर्मीले जिम्मेवारीभन्दा बाहिर भएर निर्वाचन प्रभावित गर्ने गतिविधि गरेको पाइएमा कारबाही गरिने समेत आयोगले जनाएको छ ।
निर्वाचन सम्बन्धी गतिविधिमा संलग्न सबैले कोरोनाजस्ता सरुवा रोगको जोखिम न्यूनीकरण गर्न स्वास्थ्य प्रोटोकल पालना गर्ने व्यवस्था मिलाउन आयोगले निर्देशन दिएको छ ।
हावाहुरी र वर्षाको सम्भावनालाई ध्यानमा राखी निर्वाचनसम्बन्धी सामग्रीको सुरक्षाका लागि तिरपाल र प्लाष्टिकको व्यवस्था गर्न सम्बन्धित जिल्ला विपद् व्यवस्थापन समिति, सम्बन्धित निर्वाचन क्षेत्रअन्तर्गतका स्थानीय तह र स्थानीय तहका विपद् व्यवस्थापन केन्द्रलाई आग्रह गरेको छ ।
