काठमाडौं, कार्तिक १३ । काठमाडौं उपत्यकाबाट गत बुधबार मध्यान्ह देखिएको मनोरम हिमाली दृश्यले प्रकृतिको अनुपम सौन्दर्यलाई उजागर गरेको छ। मौसम खुलेसँगै लाङटाङ लिरुङ, दोर्जे लाक्पा र जुगल हिमशृङ्खलाका हिमालहरू स्पष्ट र आकर्षक रूपमा देखिएका हुन्।
सेताम्मे हिउँले ढाकिएका हिमालका चुचुराहरू खुला आकाशमुनि मुस्कुराइरहेको दृश्यले उपत्यकाको वातावरणलाई थप मनमोहक बनाएको थियो। विशेषगरी लाङटाङ लिरुङ हिमालको आकर्षक स्वरूपसँगै दोर्जे लाक्पा र जुगल हिमशृङ्खलाको भव्यताले प्रकृतिप्रेमीहरूको ध्यान खिचेको छ।
मौसम अनुकूल हुँदा काठमाडौं उपत्यकाबाटै देखिने यस्ता हिमाली दृश्यले प्राकृतिक सौन्दर्यको अवलोकन गर्ने अवसर प्रदान गर्नुका साथै उपत्यकाको भौगोलिक र प्राकृतिक विशिष्टतालाई समेत झल्काउने गर्दछ।
दैनिक व्यस्तताबीच घर तथा आसपासबाटै अवलोकन गर्न सकिने यस्ता मनोरम दृश्यले प्रकृतिप्रतिको आकर्षण र हिमाली पर्यटनको सम्भावनालाई समेत स्मरण गराउँछन्।
