काठमाडौं, कार्तिक १४ । तेस्रो संस्करणको नेपाल प्रिमियर लिग (एनपीएल) अन्तर्गत आज दुई खेल हुँदैछन्। कीर्तिपुरस्थित त्रिभुवन विश्वविद्यालयको क्रिकेट मैदानमा हुने पहिलो खेलमा साविक विजेता लुम्बिनी लायन्स र चितवन राइनोजबीच प्रतिस्पर्धा हुनेछ। खेल दिउँसो १२:३० बजे सुरु हुनेछ।
आजै हुने दोस्रो खेलमा विराटनगर र सुदूरपश्चिम रोयल्स आमनेसामने हुनेछन्। यी दुई टोलीबीचको खेल अपराह्न ४:३० बजे सुरु हुने तालिका छ।
तर, विगत दुई दिनदेखि निरन्तर भइरहेको वर्षाका कारण आजका दुवै खेल प्रभावित हुन सक्ने सम्भावना छ। वर्षा जारी रहेमा खेल सञ्चालनमा कठिनाइ हुन सक्ने देखिएको छ।
जारी प्रतियोगितामा लुम्बिनी लायन्स र चितवन राइनोजले आ–आफ्नो पहिलो खेलमा जित हात पारेका छन्। विराटनगरले भने खेलेका दुवै खेलमा पराजय भोगेको छ। यस्तै, सुदूरपश्चिम रोयल्सले एक खेलमा जित र अर्को खेलमा हार बेहोरेको छ।
