भक्तपुर, जेठ ७ । सांस्कृतिक, ऐतिहासिक तथा सभ्यताको धनी सहर भक्तपुरमा अवस्थित ख्वप माध्यमिक विद्यालय आज गुणस्तरीय र सुलभ शिक्षाको प्रतीकका रूपमा स्थापित भएको छ।
भक्तपुर नगरपालिकाद्वारा स्थापना तथा सञ्चालन गरिएको यस विद्यालयले शिक्षालाई व्यापार होइन, समाज निर्माणको आधार मान्दै हजारौं विद्यार्थीको भविष्य निर्माणमा महत्वपूर्ण योगदान पुर्याउँदै आएको छ। विसं १९९९ मा स्थापना भएको ख्वप माध्यमिक विद्यालयले स्थानीय विद्यार्थीलाई न्यून शुल्कमा उच्चस्तरीय शिक्षा प्रदान गर्ने उद्देश्यका साथ आफ्नो यात्रा सुरु गरेको थियो।
स्थापना कालदेखि नै विद्यालयले अनुशासन, शैक्षिक उत्कृष्टता तथा सामाजिक उत्तरदायित्वलाई आफ्नो मूल मन्त्र बनाउँदै आएको छ। नगरपालिकाको प्रत्यक्ष व्यवस्थापनमा सञ्चालन हुने यस विद्यालय भक्तपुर नगरपालिकाअन्तर्गत सञ्चालित चार प्रमुख शैक्षिक संस्थामध्ये एक हो। विद्यालयले राष्ट्रिय परीक्षा बोर्डअन्तर्गत कक्षा ११ र १२ सञ्चालन गर्दै आएको छ।
विज्ञान, व्यवस्थापन तथा मानविकी, शिक्षा, कानुन संकायमा अध्ययनको अवसर उपलब्ध गराउँदै आएको विद्यालयले विद्यार्थीहरूलाई उच्च शिक्षाका लागि बलियो आधार तयार पार्दै आएको छ। ख्वप कलेजसँगको शैक्षिक सहकार्यका कारण विद्यार्थीहरूले स्नातक तथा स्नातकोत्तर तहसम्मको अध्ययन आफ्नै नगरभित्र सहज रूपमा गर्न सक्ने वातावरण समेत निर्माण भएको छ।
त्रिभुवन विश्वविद्यालयसँग आबद्ध ख्वप कलेजले विज्ञान, व्यवस्थापन तथा मानविकी क्षेत्रमा उच्च शिक्षा प्रदान गर्दै आएको छ। ख्वप माध्यमिक विद्यालयले केवल पाठ्यपुस्तकमा आधारित शिक्षा मात्र नभई व्यवहारिक, सिर्जनात्मक तथा जीवनोपयोगी शिक्षालाई विशेष प्राथमिकता दिँदै आएको छ।
विद्यालयले निरन्तर मूल्याङ्कन प्रणालीअन्तर्गत नियमित परीक्षा, परियोजना कार्य, प्रस्तुतीकरण, अनुसन्धान, प्रदर्शनी, शैक्षिक भ्रमण तथा प्रतिवेदन लेखनजस्ता गतिविधिलाई शिक्षण प्रक्रियासँग जोडेको छ। अतिरिक्त कक्षा तथा अडियो–भिजुअल माध्यमबाट गरिने शिक्षणले विद्यार्थीहरूको सिकाइलाई अझ प्रभावकारी र रोचक बनाएको छ।
विद्यालयको भौतिक संरचना पनि विद्यार्थीमैत्री रहेको छ। फराकिला तथा व्यवस्थित कक्षाकोठा, शान्त र स्वच्छ वातावरण, आधुनिक प्रयोगशाला तथा समृद्ध पुस्तकालयले विद्यार्थीलाई अध्ययन र अनुसन्धानका लागि उपयुक्त वातावरण प्रदान गरेका छन्। साथै विद्यालय परिसरमा भलिबल, बास्केटबल, टेबलटेनिस तथा ब्याडमिन्टनजस्ता खेलकुद गतिविधिका लागि आवश्यक सुविधा उपलब्ध छन्।
विद्यार्थीको स्वास्थ्यलाई ध्यानमा राख्दै स्वच्छ क्यान्टिन सेवा तथा यातायात सुविधा समेत सञ्चालन गरिएको छ। विद्यालयले विद्यार्थीलाई केवल शैक्षिक रूपमा सक्षम बनाउने मात्र नभई सामाजिक रूपमा जिम्मेवार नागरिकका रूपमा विकास गर्ने लक्ष्य लिएको छ। अन्याय, विभेद तथा शोषणविरुद्ध सचेत बनाउने गतिविधि, नेतृत्व विकास कार्यक्रम तथा सामाजिक सहभागिताले विद्यार्थीहरूमा सकारात्मक सोच र उत्तरदायित्वको भावना विकास गर्ने विद्यालयको विश्वास छ।
वातावरण संरक्षण, सामाजिक एकता तथा लोकतान्त्रिक मूल्यप्रतिको चेतना अभिवृद्धिमा विद्यालयले विशेष ध्यान दिँदै आएको छ। ख्वप माध्यमिक विद्यालयका प्राचार्य लक्ष्मीप्रसाद कर्माचार्यका अनुसार विद्यालयले ज्ञान, सीप र संस्कारलाई सँगसँगै अघि बढाउने लक्ष्य लिएको छ। “आजको प्रतिस्पर्धात्मक युगमा विद्यार्थीलाई केवल शैक्षिक ज्ञानले मात्र पुग्दैन, उनीहरूमा सिर्जनशीलता, अनुशासन, नेतृत्व क्षमता र सामाजिक उत्तरदायित्व पनि आवश्यक हुन्छ,” प्राचार्य लक्ष्मीप्रसाद कर्माचार्यले बताए।
राष्ट्रिय स्तरमै उत्कृष्ट शैक्षिक संस्थाका रूपमा परिचित ख्वप माध्यमिक विद्यालयले गुणस्तरीय शिक्षा, अनुभवी शिक्षक, अनुशासित वातावरण तथा व्यवहारिक शिक्षण पद्धतिका कारण अभिभावक र विद्यार्थीको विश्वास जित्दै आएको छ। आधुनिक शिक्षा र मौलिक संस्कृतिबीच सन्तुलन कायम गर्दै अघि बढिरहेको यो विद्यालय आज भक्तपुरको मात्र होइन, समग्र नेपालको शैक्षिक गौरवका रूपमा स्थापित भएको छ।
