काठमाडौं, चैत २९ । निर्वाचन आयोगले आगामी वैशाख १० गते हुने प्रतिनिधिसभा सदस्यको उपनिर्वाचनको निर्वाचन पर्यवेक्षणका लागि ६ संस्थालाई अनुमति दिएको छ ।
आयोगले आज जारी गरेको सूचनामा निर्वाचन पर्यवेक्षण निर्देशन–२०७९ बमोजिम पर्यवेक्षणका लागि निवेदन दिने सात संस्थामध्ये छ वटा छनोट भएको जनाएको छ ।
आयोगका प्रवक्ता शालिग्राम शर्मा पौडेलका अनुसार पर्यवेक्षणका लागि तोकिएको प्रक्रिया पूरा गर्ने आधारमा छनोट गरिएको हो ।
अनुमति प्राप्त गर्ने संस्थामा राष्ट्रिय निर्वाचन पर्यवेक्षण समिति, इन्सेक, सुशासन महासंघ नेपाल, विश्व उपभोक्ता महासंघ नेपाल, पूर्व न्यायाधीश मञ्च नेपाल र राष्ट्र निर्माण मञ्च नेपाल रहेका छन् ।
उक्त दिन बारा–२, तनहुँ–२ र चितवन–२ मा हुने उपनिर्वाचनको अवलोकन गर्न यी छनोट भएका संस्थाबाट सिफारिस भएका व्यक्तिहरूलाई अनुमति दिइनेछ ।
Published Date: 12 April 2023
