काठमाडौं, चैत २२ । चितवन–२ बाट प्रतिनिधिसभा सदस्य पदका लागि पुनः उम्मेदवार बनेका राष्ट्रिय स्वतन्त्र पार्टीका अध्यक्ष रवि लामिछानेविरुद्ध चारवटा उजुरी परेका छन् । मंगलबार मुख्य निर्वाचन अधिकृतको कार्यालयमा उजुरी दर्ता भएको हो ।
उम्मेदवार र तिनका प्रतिनिधिबाट तीनवटा उजुरी परेको छ भने एउटा उजुरी अधिवक्ता युवराज पौडेलले इमेलमार्फत दिएको कार्यालयका सहायक निर्वाचन अधिकृत ईश्वर आचार्यले बताए ।
नेपालको नागरिकता पाएको ९० दिनपछि मात्रै उम्मेदवार बन्न पाउने कानुनले लामिछानेलाई उम्मेदवार बनाइदिने वैधानिकतालाई उजुरीकर्ताले चुनौती दिएका छन् ।
बुधबार दिउँसो ३ बजेसम्म परेका उजुरीमाथि छलफल गरी निर्णय गरिने आचार्यले जानकारी दिए । उपनिर्वाचनका लागि १२ राजनीतिक दलसहित २४ जनाले उम्मेदवारी दर्ता गराएका छन् ।
गत मंसिर ४ गते निर्वाचनमा सोही क्षेत्रबाट निर्वाचित लामिछानेको नागरिकता सर्वोच्च अदालतले खारेज गरेपछि चितवनमा उपनिर्वाचन हुन लागेको हो ।
