काठमाडौं, चैत २२ । सरकारले सवारीसाधनमा लगाइने इम्बोस्ड नम्बर प्लेटमा नेपाली भाषामा पनि लेख्न आवश्यक व्यवस्था गरेको छ ।
सोमबार बसेको मन्त्रिपरिषद्को बैठकले सवारी तथा यातायात व्यवस्था ऐन, २०४९ को अनुसूची–२ लाई संशोधन गर्न स्वीकृति दिने निर्णय गरेको हो ।
यसका साथै इम्बोस्ड नम्बर प्लेटहरू देवनागरी र अंग्रेजी दुवै लिपिमा लेख्न सकिन्छ। लामो समयदेखि विवाद र बहसको विषय बनेको यो विषय सरकारले सोमबार समाधान गरेको छ ।
मन्त्रिपरिषद् बैठकका निर्णय सार्वजनिक गर्न मंगलबार आयोजित पत्रकार सम्मेलनमा सञ्चार तथा सूचना प्रविधिमन्त्री रेखा शर्माले इम्बोस्ड नम्बर प्लेटमा अङ्ग्रेजी अक्षर र नम्बरहरू देवनागरी लिपिमा लेख्न पाउने व्यवस्था संशोधन गरिएको बताइन् ।
सरकारका प्रवक्ता समेत रहेका मन्त्री शर्माले इम्बोस्ड नम्बर प्लेटमा नेपाली र अङ्ग्रेजी दुवै भाषामा लेख्न पाउने कानुनी व्यवस्था मिलाइएको बताए ।
