काठमाडौं, चैत १५ । नेपाल क्रिकेट संघ (क्यान) ले आगामी अप्रिल १८ देखि मे १ सम्म नेपालमा आयोजना हुने एसीसी पुरुष प्रिमियर कप प्रतियोगिताका लागि २१ सदस्यीय प्रारम्भिक टोलीको घोषणा गरेको छ ।
छनोट टोलीमा सन्दीप लामिछाने, ज्ञानेन्द्र मल्ल, आरिफ शेख, कुशल भुर्तेल, भीम सार्की, आसिफ शेख, प्रतिश जिसी, ललित राजवंशी, रोहित पौडेल र सन्दिप जोरा रहेका छन् । त्यस्तै अन्य सदस्यमा सोमपाल कामी, किशोर महतो, कुशल मल्ल, श्याम ढकाल, कमलसिंह ऐरी, दीपेन्द्रसिंह ऐरी, अर्जुन साउद, गुलशन झा, सूर्य तामाङ, करण केसी र देव खनाल रहेका छन् ।
एशियन क्रिकेट काउन्सिलको आयोजनामा कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदान र मुलपानी क्रिकेट मैदानमा हुने प्रतियोगितामा विभिन्न १० देशको सहभागिता रहनेछ ।
सहभागी टोलीलाई दुई समूहमा विभाजन गरिएको छ । समूह ‘ए’ मा नेपालसँगै साउदी अरेबिया, मलेसिया, कतार र ओमान छन् । त्यस्तै समूह ‘बी’ मा कुवेत, बहराइन, सिंगापुर, हङकङ र संयुक्त अरब इमिरेट्स रहेका छन् । उद्घाटन खेलमा नेपालले मलेसियासँग खेल्नेछ । विजेता सेप्टेम्बरमा पाकिस्तानमा हुने एसिया कपका लागि छनोट हुनेछ।
