काठमाडौं, चैत १५ । नेपाल चलचित्र प्राविधिक संघ (नेफ्टा)ले आगामी वैशाख १ गतेदेखि छायांकनमा सिफ्ट प्रणाली लागू गर्ने भएको छ ।
चलचित्र प्राविधिकहरुको छाता सङ्गठनले सोही मितिदेखि १२ घण्टा सिफ्ट प्रणाली तोकेर प्राविधिकलाई काम गर्न दिने निर्णय गरेको छ ।
अध्यक्ष पुष्कर लामाले अन्तर्राष्ट्रिय चलचित्र उद्योगमा काम गर्ने श्रमिकको अभ्यासलाई हेरेर नेपालमा पनि यस्तो प्रणाली लागु गर्न लागिएको बताए । प्रणालीअनुसार अब नेपाली प्राविधिकले अब बिहान ७ बजेदेखि बेलुकी ७ बजे र बिहान ९ बजेदेखि बेलुका ९ बजेसम्म १२ घण्टाको समयतालिका अनुसार काम गर्नुपर्नेछ ।
प्राविधिकले ओभरटाइम काम गर्नु परेमा निर्देशकले थप पारिश्रमिक तिर्नु पर्नेछ । नेफ्टाको हालै बसेको कार्यसमितिको बैठकले यस्तो निर्णय गरेको हो । ‘हामीले २०७६ सालदेखि यो अभ्यास सुरु गर्ने तयारी गरेका थियौं, तर कोभिड–१९ को महामारीका कारण यो प्रणाली लागू हुन नसकेको हो,’ अध्यक्ष लामाले भने । ‘चलचित्रको हालको अवस्था र व्यापारलाई हेरेर हामीले यो नियम ल्याएका हौँ ।
अध्यक्ष लामाले नेफ्टाले नेपाल चलचित्र निर्माता संघ (एनएफपीए) र चलचित्र चलचित्र संघ जस्ता सम्बन्धित निकायलाई सिफ्ट प्रणाली लागू गर्न सहयोग गर्ने बताए । विदेशी चलचित्र उद्योगमा आठ घन्टाको नियम प्रचलनमा छ ।
नेफ्टाले नेपालमा छायांकन हुने विदेशी चलचित्रमा ६५ प्रतिशत नेपाली प्राविधिक हुनुपर्ने र नेपालमा छायांकन गर्दा नेफ्टालाई सहयोग गर्नुपर्ने नियम पनि ल्याएको छ ।
बैशाख १४ गतेदेखि नेफ्टामा दर्ता र सहयोग नगर्ने प्राविधिकले काम गर्न पाउने छैनन् र संघबाट सुविधासमेत पाउने छैनन् । ‘प्राविधिकको अधिकार र सुरक्षालाई ध्यानमा राखी दिनहुँ आउने समस्यालाई न्यूनीकरण गर्न यो नियम ल्याउदैछौँ’, अध्यक्ष लामाले भने । कार्ड भएका प्राविधिकले मात्र काम गर्न पाउने नियम बनाएर प्राविधिक र निर्देशक दुवैलाई सहज हुने विश्वास लिएका छौं ।
लामाले प्राविधिक अधिकार र चलचित्रको अन्तर्राष्ट्रियकरणलाई मुख्य एजेण्डा बनाएका छन् । यसबाहेक प्राविधिकहरूलाई सामाजिक सुरक्षाको दायराभित्र ल्याउने, प्राविधिकहरूको क्षमता अभिवृद्धि गर्ने, अवार्डमार्फत नेपाली चलचित्रको विदेशमा बजार खोज्ने जस्ता योजनाहरू छन् ।
