काठमाडौं, चैत १५ । चलचित्र विकास बोर्डले हटलाइन नम्बरसहितको ‘सिनेमा साइबर सेक्युरिटी’ डेस्क सञ्चालन गर्न लागेको छ ।
मंगलबार एक कार्यक्रमको आयोजना गर्दै बोर्डले डेस्कका लागि प्रणाली विकासको काम सुरु भइसकेको बताएको हो । साइबर सुरक्षासँगै बोर्डलाई डिजिटल प्रविधिमा लैजाने योजना पनि प्रदर्शन गरिएको छ ।
कार्यक्रममा नेपाल रोबोटिक्स एकेडेमीका संस्थापक विक्रान्त कार्की र आइडिया ब्रीड टेक्नोलोजीका निवेश किरण अधिकारीले संयुक्त रुपमा सिनेमा साइबर सेक्युरिटी डेस्कको प्रदर्शन गरेका थिए । यी दुई आईटी कम्पनीहरूले डेस्कको लागि प्रणाली विकासमा काम गर्नेछन्।
बोर्डका अध्यक्ष भुवन केसीले नेपाली चलचित्र उद्योगमा साइबर आक्रमण हुन नदिन ‘सिनेमा साइबर सेक्युरिटी’ निर्माण गरिएको बताए । “प्रविधिको विकासले हाम्रो जीवनशैलीमा ठूलो परिवर्तन ल्याएको छ । यसका सकारात्मक र नकारात्मक दुवै पक्ष छन् ।
टिकटक, युट्युब र फेसबुक जस्ता सामाजिक सञ्जाल साइटहरूले नेपाली फिल्म निर्माताहरूलाई आफ्नो काम प्रदर्शन गर्न र फराकिलो दर्शकसम्म पुग्न सजिलो बनाएको छ। तर, यसले साइबर सुरक्षाका सन्दर्भमा नयाँ चुनौती पनि खडा गरेको छ । यी चुनौतीलाई सम्बोधन गर्न चलचित्र विकास बोर्डले ‘सिनेमा साइबर सेक्युरिटी’ सम्बन्धी डेडिकेटेड डेस्क स्थापना गर्ने नीति लिएर सक्रिय कदम चाल्ने निर्णय गरेको केसीले बताए ।
नेपाल चलचित्र निर्माता संघका अध्यक्ष नवल खड्काले बोर्डले साइबर सेक्युरिटी डेस्क तत्काल कार्यान्वयन गर्नुपर्नेमा जोड दिए । बोर्डले सिनेमा साइबर सेक्युरिटी डेस्क सञ्चालनका लागि आगामी आर्थिक वर्षको बजेट विनियोजनका लागि सञ्चार तथा सूचना प्रविधि मन्त्रालयमा प्रस्ताव पेश गरिसकेको छ ।
Published Date: 29 March 2023
