कोलम्बो, चैत १५ । श्रीलंकाको ऊर्जा मन्त्रालय र जलवायु परिवर्तन कार्यालयले आगामी दुई महिनाभित्र नवीकरणीय ऊर्जामा हरित आर्थिक नीति लागू गर्ने तयारी गरेको छ ।
राष्ट्रपतिको मिडिया डिभिजन (पीएमडी) ले विज्ञप्ति जारी गर्दै सो बारे उल्लेख गरेको छ । ’श्रीलंकासँग नवीकरणीय स्रोतहरु जस्तै सौर्य, वायु, बायोगास र समुद्री छालहरु मार्फत ऊर्जा उत्पादन गर्ने ठूलो सम्भावना छ ।
राष्ट्रपति (रानिल) विक्रमासिंघे हरित अर्थतन्त्रमा परिणत हुनु नै श्रीलंकाको बलियो अर्थतन्त्र निर्माणको आधार हुनसक्ने विश्वास व्यक्त गरेका छन्’ विज्ञप्तिमा भनिएको छ ।
हरित आर्थिक नीति दीर्घकालीन पहल हो जसका लागि कानुनी आधार चाहिने भन्दै राष्ट्रपतिले नयाँ नीतिमा समायोजन गर्नका लागि तुरुन्तै कानून पारित गर्नुपर्ने आवश्यकतामा जोड दिएका छन् ।
रासस-सिन्ह्वा