काठमाडौं, फागुन २१। प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’विरुद्ध रिट निवेदन दर्ता गर्न सर्वोच्च अदालतले दिएको आदेशमा नेकपा (माओवादी केन्द्र)ले आपत्ति जनाएको छ ।
आइतबार माओवादी केन्द्रका महासचिव देव गुरुङले विज्ञप्ति जारी गर्दै न्यायाधीश ईश्वर खतिवडा र हरि फुयाँलको संयुक्त इजलासले गरेको आदेशप्रति गम्भीर ध्यानाकर्षण भएको बताए ।
२०२० जनवरी १५ मा टुँडिखेलमा आयोजित एक कार्यक्रममा प्रधानमन्त्री दाहालले सशस्त्र द्वन्द्वमा मारिएका ५ हजारको जिम्मेवारी आफूले लिने बताएका थिए । अधिवक्ता ज्ञानेन्द्रराज अरण लगायतले दाहालको अभिव्यक्तिको छानबिन गरी कारबाही गर्न माग गर्दै सर्वोच्च अदालतमा रिट दायर गरेका थिए ।
यसअघि सर्वोच्च प्रशासनले राजनीतिक अभिव्यक्तिका आधारमा निवेदन दर्ता गर्न नमिल्ने भन्दै निवेदन दर्ता गर्न अस्वीकार गरेको थियो ।
तर शुक्रबार न्यायाधीश ईश्वर खतिवडा र हरि फुयाँलको संयुक्त इजलासले रिट दर्ता गर्न आदेश दिएको हो ।
