भक्तपुर, कार्तिक १६ । शुक्रबार र शनिबार लगातार भएको वर्षापछि मौसम खुलेसँगै शनिबार अपराह्न भक्तपुरबाट देखिएका मनोरम हिमाली दृश्यले प्रकृतिको अनुपम सौन्दर्यलाई उजागर गरेको छ।
वर्षापछि खुलेको आकाशमुनि लाङटाङ लिरुङदेखि दोर्जे लाक्पा र जुगल हिमशृङ्खलासम्मका हिमालहरू स्पष्ट र आकर्षक रूपमा देखिएका हुन्। सेताम्मे हिमालका चुचुराहरू खुला आकाशमुनि चम्किँदा उपत्यकाको वातावरण थप मनमोहक बनेको थियो।
विशेषगरी लाङटाङ लिरुङ, गणेश हिमाल, दोर्जे लाक्पा, फूर्वी च्याचु तथा जुगल हिमशृङ्खलाका हिमालहरूको आकर्षक दृश्यले प्रकृतिप्रेमीहरूको ध्यान खिचेको छ।
लगातारको वर्षाले वातावरणमा रहेको धुलो र प्रदूषण कम गरेपछि हिमालहरू अझ स्पष्ट देखिएको अनुमान गरिएको छ। भक्तपुरबाटै देखिएका यी मनमोहक दृश्यले उपत्यकाको प्राकृतिक सौन्दर्य र हिमाली दृश्यावलोकनको अनुपम सम्भावनालाई पुनः उजागर गरेको छ।
शनिबार अपराह्न देखिएको हिमाली दृश्यले स्थानीयवासी तथा प्रकृतिप्रेमीहरूलाई मन्त्रमुग्ध बनाएको थियो।
