काठमाडौं, फागुन १५ । अभिनेता पूर्णविक्रम शाह (पल) आज रिहा भएका छन् । बालिका बलात्कारको आरोपमा जेलमा रहेका शाहलाई आइतबार पोखरा उच्च अदालतले सफाइ दिएपछि आज जेलमुक्त भएको छ ।
अदालतको आदेशपछि जिल्ला प्रहरी कार्यालय तनहुँको हिरासतबाट साह रिहा हुने थाहा पाएपछि उनका समर्थक आज बिहान दमौली पुगेका थिए । उनीहरुले पल शाहको पक्षमा नारा समेत लगाएका थिए । समर्थकहरुको बाक्लो भीड रहेकाले सुरक्षा व्यवस्था कडा पारिएको छ ।
न्यायाधीश डिल्लीराज आचार्य र श्रीधरकुमारी पुडासैनीको संयुक्त इजलासले अभियोजन पक्षको दाबी पर्याप्त नभएको भन्दै आइतबार सफाइ दिएको हो ।
यसअघि जिल्ला अदालत नवलपुरले बालिका बलात्कार मुद्दामा साहलाई सफाइ दिएको थियो भने साहलाई दुई वर्ष ६ महिना कैद, २५ हजार जरिवाना र पीडितलाई १० लाख जरिवाना गरेको थियो ।
जिल्ला अदालतको सोही फैसलाविरुद्ध जिल्ला सरकारी वकिलको कार्यालय र शाह पक्षले उच्च अदालत पोखरामा पुनरावेदन दायर गरेका थिए । सोही पुनरावेदनमा अदालतले अभियोजन पक्षको दाबी पर्याप्त नभएको भन्दै शाहलाई सफाइ दिएको थियो ।
आइतबार भएको सुनुवाइमा उच्च सरकारी वकिलको कार्यालयका नायव न्यायधिवक्ता रामप्रसाद अधिकारी तथा वरिष्ठ अधिवक्ता कमलामोहन वाग्ले, कृष्णबहादुर थापा, अधिवक्ता माधव घिमिरे, गणेशप्रसाद अधिकारी र जनकराज ढुंगानाले शाहका तर्फबाट बहस गरेका थिए । फैसलासँगै शाह जेलमुक्त हुनेछन् । उनलाई आज तनहुँ जिल्ला कारागारबाट रिहा गरिएको हो ।
