काठमाडौँ, फागुन १७ । संयुक्त अरब इमिरेट्स (यूएई)स्थित नेपाली दूतावासले त्यहाँ विकसित भइरहेको परिस्थितिलाई मध्यनजर गर्दै यूएईमा बसोबास गर्ने सम्पूर्ण नेपाली समुदायलाई सामाजिक सञ्जालमा अपुष्ट तथा भ्रामक सामग्री नफैलाउन आग्रह गरेको छ।
दूतावासले ‘एड्भाइजरी–२’ जारी गर्दै अज्ञात स्रोतबाट प्राप्त सूचना, हल्ला वा आधिकारिक रूपमा पुष्टि नभएका सामग्री प्रकाशन तथा प्रसारण नगर्न अनुरोध गरेको जनाएको छ।
पछिल्लो समय सामाजिक सञ्जाल तथा अन्य डिजिटल माध्यममार्फत अपुष्ट सामग्री सेयर गर्दा सुरक्षा अवस्थाबारे अनावश्यक अन्योल र भ्रम सिर्जना हुन सक्ने भएकाले यस्ता गतिविधिबाट टाढा रहन सबैलाई सचेत गराइएको छ। साथै, परिस्थितिसम्बन्धी फोटो तथा भिडियो खिचेर सामाजिक सञ्जालमा पोस्ट गर्दा पनि जिम्मेवार बन्न दूतावासले अपिल गरेको छ।
सूचनामा यूएईका सम्बन्धित सरकारी निकायहरूले यस्ता गतिविधि स्थानीय कानुनअनुसार दण्डनीय हुने चेतावनी दिइसकेको उल्लेख गरिएको छ। त्यसैले त्यहाँ रहेका नेपालीहरूलाई स्थानीय कानुनको पूर्ण पालना गर्न तथा अफवाह फैलाउने कार्य नगर्न विशेष आग्रह गरिएको छ।
दूतावासले विकसित परिस्थितिबारे सही र आधिकारिक जानकारीका लागि यूएई सरकारका आधिकारिक वेबसाइट तथा सूचनामार्फत मात्रै अपडेट लिन अनुरोध गरेको छ। सरकारी निकायबाट जारी हुने सूचना तथा आधिकारिक अपडेटलाई मात्र आधार मान्न समेत आग्रह गरिएको छ।
यसअघि दूतावासले पहिलो एड्भाइजरी जारी गर्दै नेपाली नागरिकलाई अनावश्यक यात्रा नगर्न समेत सुझाव दिएको थियो।
