काठमाडौँ, माघ १ । राष्ट्रिय कृषि कम्पनी नेपाल लिमिटेडको दोस्रो वार्षिक साधारण सभा भक्तपुरको कौशलटारस्थित ह्वाइट प्यालेस ब्याङ्क्वेटमा सम्पन्न भएको छ । सभाले कम्पनीले प्रस्तुत गरेका सबै प्रस्ताव सर्वसम्मत रूपमा पारित गरेको छ ।
सभाबाट कम्पनीको साधारण सेयर (आईपीओ) निष्कासनसम्बन्धी विशेष प्रस्ताव पनि पारित भएको छ । सेयर निष्कासन तथा बिक्री प्रबन्धकका रूपमा ग्लोबल आईएमई क्यापिटल लिमिटेड नियुक्त भइसकेकाले अब आईपीओ प्रक्रिया अघि बढ्ने कम्पनीले जनाएको छ ।
कम्पनीका अनुसार हाल संस्था नाफामा सञ्चालनमा रहेको छ भने नेटवर्थ करिब ११२ प्रतिशत पुगेको छ । सर्लाहीको लालबन्दीमा दैनिक करिब १,५०० केजी डल्ले च्याउ उत्पादन क्षमताको संरचना निर्माण अन्तिम चरणमा पुगेको छ । साथै, वार्षिक करिब २० लाख टन कम्पोस्ट मल उत्पादन क्षमताको प्लान्ट निर्माण कार्य सुरु भएको छ ।
त्यस्तै, काभ्रेको पनौती–४ मा मिनिमार्ट तथा कृषि उपज प्रशोधन केन्द्रको संरचना निर्माण अन्तिम चरणमा रहेको र आगामी महिनाबाट सञ्चालनमा ल्याइने जानकारी दिइएको छ ।
यसै दिन कम्पनीको सहायक संस्था आर.के.सी.एन.एल. आईटेक लिमिटेडको प्रथम वार्षिक साधारण सभा पनि सम्पन्न भएको छ ।
