काठमाडौँ, माघ १ । हिउँद निख्रिन अब करिब डेढ महिना मात्रै बाँकी रहँदा पनि लामो समयदेखि वर्षा नहुँदा देशभर सुख्खा बढ्दै गएको छ । सामान्यतया मंसिर १५ देखि फागुन १५ सम्मलाई हिउँदयाम मानिए पनि हिउँद सुरु भएको डेढ महिनासम्म एक झर पानी नपर्दा हिउँदे खेती प्रभावित भएको छ ।
वर्षा नहुँदा वातावरण झन् प्रदूषित बन्दै गएको छ । धुवाँधूलोका कारण सास फेर्न समेत कठिन भएको छ भने विभिन्न स्थानमा डढेलोको समस्या पनि देखिन थालेको छ ।
यसबीच मौसमविदहरूले भने आगामी हप्ताबाट केही राहत मिल्ने संकेत गरेका छन् । मौसमविद विनोद पोखरेलका अनुसार अर्को हप्ताबाट नेपालमा पश्चिमी वायु सक्रिय भई हिउँदे वर्षाको सम्भावना देखिएको छ ।
उनले मौसम पूर्वानुमान अनुसार शुक्रबार, जनवरी २३ (माघ ९) देखि देशका विभिन्न स्थानमा हिउँदको पहिलो वर्षा हुने सम्भावना राम्रो रहेको बताएका छन् । यो प्रणालीले करिब एक हप्तासम्म प्रभाव पार्न सक्ने अनुमान गरिएको छ ।
तर पश्चिमी न्यूनचापीय प्रणालीले बाटो परिवर्तन गर्न सक्ने भएकाले पूर्वानुमानमा परिवर्तन हुन सक्ने सम्भावना पनि रहेको मौसमविद पोखरेलले जनाएका छन् । आगामी दिनमा थप अद्यावधिक गरिने उनले सामाजिक सञ्जालमार्फत जानकारी दिएका छन् ।
