काठमाडौं, फागुन ८ । नेपाल नागरिक उड्डयन प्राधिकरणले गुण एयरलाइन्सका सबै उडान स्थगित गरेको छ । कम्पनीले पछिल्लो समय कर्मचारीलाई तलब नदिएको र कम्पनीका विभिन्न क्षेत्रको बक्यौता रहेको भन्दै प्राधिकरणले उडान रोकेको हो ।
क्यानका प्रवक्ता जगन्नाथ निरौलाले यात्रु सेवाको विश्वसनीयतामा प्रश्न उठेपछि हवाई सुरक्षा विभागले उडान तत्कालका लागि स्थगित गरेको बताए । प्राधिकरणले सोमबार कम्पनीलाई तत्काल उडान नगर्न पत्र लेखेको उनले बताए ।
‘कम्पनीको आर्थिक अवस्था कमजोर रहेको र कम्पनीमा विभिन्न क्षेत्रका कर्मचारी र कर्मचारीको बक्यौता रहेको देखिन्छ । यस्तो अवस्थामा एयरलाइन्सको उडान सुरक्षामा असर पर्ने देखियो । यात्रुको सुरक्षालाई ध्यानमा राख्दै अर्को सूचना नआएसम्मका लागि हामीले गुण एयरलाइन्सको उडान स्थगित गरेका छौं,’ प्रवक्ता निरौलाले भने ।
यसैबीच, एयरलाइन्सले प्राधिकरणबाट उडान स्थगित गर्ने कुनै पत्र नपाएको जनाएको छ। प्रवक्ता प्रज्वल थापाले पाइलटको तालिम र स्पेयर पार्ट्स अभावका कारण नियमित उडान प्रभावित भएको बताए । ‘हामीले आफ्नै कारणले अहिले उडान रोकेका छौं, प्राधिकरणबाट आधिकारिक पत्र आएको छैन,’ प्रवक्ता थापाले भने । ‘सोमबारदेखि नियमित उडान गर्ने तयारीमा थियौं, तर केही कारणले उडान हुन सकेन ।”
घरजग्गा व्यवसायी राजेन्द्र शाक्य (दिजेन्द्र)ले दुई वर्षअघि यो एयरलाइन्सलाई पुनः सञ्चालनमा ल्याएका हुन् । घरजग्गा व्यवसायमा उकालो लागेका शाक्यले एक अर्ब रुपैयाँको लगानीमा यो एयरलाइन्सलाई पुनर्जीवित गरेका हुन् । उनले यति एयरलाइन्सका पाँच जेट स्ट्रिम विमान एक अर्ब रुपैयाँमा किनेर कम्पनीलाई पुनः सञ्चालनमा ल्याए ।
२०६४ सालदेखि घरजग्गा र सेयर कारोबारमा अर्बौं लगानी गरेका शाक्य नेपाल राष्ट्र बैंकले ल्याएको नीतिका कारण आर्थिक संकटमा परेका थिए । उनले १५ वर्षसम्म आर्थिक व्यवस्थापन गरेर वायुसेवा कम्पनीलाई महत्वाकांक्षी प्रवद्र्धन गरेका थिए तर प्राधिकरणको अहिलेको निर्णयले उनी समस्यामा परेका छन् ।
