काठमाडौं, फागुन ८ । सार्वजनिक खरिद अनुगमन कार्यालयले विभिन्न सार्वजनिक निकायका ठेक्का रोकेको भन्दै पाँच निर्माण व्यवसायी तथा आपूर्तिकर्ता कम्पनीलाई कालोसूचीमा राखेको छ ।
कार्यालयले आज एक सूचना जारी गर्दै कम्पनीहरुलाई कालोसूचीमा राखेको जनाएको छ । ‘विभिन्न निकायले लेखेको सार्वजनिक खरिद ऐन, २०६३ अनुसार यी निर्माण व्यवसायी र आपूर्तिकर्ता कम्पनीलाई कालोसूचीमा राखिएको छ । कालोसूचीको अवधिमा यी कम्पनीहरूलाई सार्वजनिक निकायको कुनै पनि खरिदमा भाग लिन दिइने छैन,’ खरिद अनुगमन कार्यालयले जारी गरेको सूचनामा भनिएको छ ।
पीपीएमओको गत बिहीबारको निर्णयअनुसार चितवन जिल्लाको भरतपुर–४ स्थित इन्जिनियर्स कन्स्ट्रक्सन एन्ड मिन्ट क्राफ्ट प्रालिलाई एक वर्षका लागि कालोसूचीमा राखिएको छ । सञ्चालक विकास श्रेष्ठ रहेको उक्त कम्पनीले चितवनको इच्छाकामना गाउँपालिकाको ठेक्का रोकेको थियो ।
चितवनको खैरहनी नगरपालिकाको सिफारिसमा जय गढीमाई कन्स्ट्रक्सन प्रालि पनि कालोसूचीमा परेको छ । एक वर्षदेखि कालोसूचीमा परेको यस कम्पनीको प्रमुख सञ्चालक सीताराम चौधरी हुन् ।
त्यस्तै करणकुमार मुडभरीको स्वामित्वमा रहेको मुडभरी एण्ड जोशी कन्स्ट्रक्सन प्रालिलाई पनि दुई वर्षका लागि कालोसूचीमा राखिएको छ । रसुवागढी जलविद्युत कम्पनीसँगको ठेक्का सम्झौताअनुसार यस कम्पनीले काम नगरेको पीपीएमओले जनाएको छ ।
त्यसैगरी सुदूरपश्चिम विद्यालय अन्तर्गत कैलालीस्थित दुर्गालक्ष्मी बहुउद्देश्यीय क्याम्पसको काम रोक्ने गुण निर्माण सेवा पनि कालोसूचीमा परेको छ । गुणराज पाठकले सञ्चालित यो कम्पनी एक वर्षका लागि कालोसूचीमा परेको छ । बर्दियाको बारबर्दिया नगरपालिका कार्यालयले कल्पना कन्स्ट्रक्सन प्रालिलाई कालोसूचीमा राख्न सिफारिस गरेको छ ।
