काठमाडौं, फागुन ८ । सोमबार नेप्से दोहोरो अंकले घटेको छ । आज नेप्से २३.६० अंकले घटेर दुई हजार ४६ दशमलव ८१ विन्दुमा बन्द भएको हो । गत बिहीबार भने नेप्से २१.१५ अंकले घटेर दुई हजार ७० दशमलव ४१ विन्दुमा बन्द भएको थियो ।
आज नेप्सेमा एक अर्ब ९४ करोड ७६ लाख बराबरको कारोबार भएको हो । आज कारोबार भएका कम्पनीमध्ये ३२ वटा कम्पनीको शेयरमूल्य बढेको छ भने १७७ कम्पनीको शेयरमूल्य घटेको छ । त्यस्तै ७ कम्पनीको शेयरमूल्य स्थिर रहेको छ ।
आज १३ उपसमूहमध्ये २ उपसमूहको परिसूचक बढेको छ भने बाँकी ११ उपसमूहको परिसूचक घटेको छ। कारोबारमा आएको म्युचुअल फण्ड र व्यापार उपसमूहको परिसूचक सामान्य बढेको हो। उत्पादन तथा प्रशोधन उपसमूहको परिसूचक आज सर्वाधिक ३.२० प्रतिशत घटेको छ। त्यसैगरी, लघुवित्त उपसमूहको परिसूचक २ प्रतिशतभन्दा बढी घटेको छ भने विकास बैंक र अन्य उपसमूहको परिसूचक १ प्रतिशतभन्दा बढी घटेको छ।
