काठमाडौँ, असोज २० । सिन्धुपाल्चोकस्थित कोदारी राजमार्गको डाक्लाङ खण्डमा पहिरो खस्दा तातोपानी नाका पुनः अवरुद्ध बनेको छ। चीनतर्फका करिब ७०–७५ प्रतिशत कन्टेनर सडक बन्दका कारण रोकिएका छन् भने फलफूलका कन्टेनर कुहिँदै नष्ट गर्नुपरेको व्यवसायीहरूले बताएका छन्।
दशैं, तिहार र जाडोका लागि ल्याइएका कपडा, इलेक्ट्रोनिक्स, जुत्ता, जाकेट र कम्बललगायतका सामग्री बोकेका सयौँ कन्टेनर चीनमै थन्किएका छन्।
सडक डिभिजनका अनुसार डाक्लाङमा ठूलो पहिरोका कारण बाटो खोल्न केही दिन लाग्नेछ। यस्तै, चीनले अक्टोबर १ देखि नेपालतर्फ निर्यात हुने सामानमा कर बढाएकोले ढुवानी अझै जटिल बनेको व्यापारीहरूको गुनासो छ।
