काठमाडौं, भदौ १९ । विविध भाषा र भाकामा पाँच हजारभन्दा बढी गीतमा स्वर दिएकी वरिष्ठ गायिका इन्दिरा गोले गुरुङको निधन भएको छ ।
बुधबार बिहान करिब २ बजे ललितपुरको हात्तीवनस्थित अपार्टमेन्टमा उनको निधन भएको हो।
५९ वर्षीया गोले गुरुङ पछिल्लो दुई वर्षदेखि क्यान्सरबाट पीडित थिइन् । हरिसिद्धिस्थित क्यान्सर अस्पतालमा उपचार गराएपछि उनी दुई सातादेखि हात्तीवनमा कान्छी छोरीसहित अपार्टमेन्टमा बसेर उपचार र आराम गरिरहेकी थिइन् ।
गुरुङको पार्थिव शरीरलाई बौद्ध संस्कारअनुसार अन्त्येष्टि गरिनेछ।
तामाङ कलाकार समाजकी पूर्वअध्यक्ष समेत रहेकी उनले तामाङ गीत–संगीतलाई अन्तर्राष्ट्रिय स्तरसम्म पुर्याउन महत्वपूर्ण योगदान पुर्याएकी थिइन् । रेडियो नेपालमा स्वर परीक्षा उत्तीर्ण भएपछि उनले नेपाली लोकदोहोरी, आधुनिक र तामाङ गीतहरूमा आफ्नो विशिष्ट पहिचान बनाउन सफल भएकी थिइन् ।
सन् १९६६ अक्टोबर १९ मा ललितपुरको भर्देउमा जन्मेकी उनी तामाङ सेलो र अन्य लोकगीतमार्फत तामाङ संस्कृतिको संरक्षण तथा प्रवर्धनमा सक्रिय रहिन् । उनका चर्चित गीतहरूमा नारायणथानमा गेट, चाँगुनारायण थान, जाइफूलको बासना, घर त छाउनीमा, सफा ट्याम्पुरी, होइ ताङ्बा, गाङ ग्याब्सेला लगायतका सदाबहार सिर्जना रहेका छन् ।
उनको उपचारका लागि तामाङ कलाकार संघलगायत विभिन्न संघ–संस्थाले आर्थिक संकलन अभियानसमेत चलाएका थिए । इन्दिरा गोले गुरुङका दुई छोरी छन् भने उनका श्रीमान्को पहिले नै निधन भइसकेको छ ।
