भक्तपुर, भदौ ६ । पेशाले स्वास्थ्यकर्मी भई पाटन अस्पतालको ल्याब विभागमा कार्यरत राजु कर्माचार्यले आफ्नै शब्द, संगीत र स्वरमा सजिएको नयाँ गीत “आफ्नो मान्छे” सार्वजनिक गरेका छन्।
मर्मस्पर्शी प्रेमभाव समेटिएको उक्त गीतको म्युजिक भिडियो हालै मात्र हाइलाइट्स नेपाल युट्युब च्यानलमार्फत सार्वजनिक भएको हो।
गीतका एरेन्जर जुगल डंगोल हुन्।
संगीतप्रेमी कर्माचार्यलाई गीत–संगीतमा गहिरो रुचि छ। कार्यव्यस्त जीवनशैलीबीच पनि उनले फुर्सदको समयमा गीत लेखन, संगीत सिर्जना तथा गायनलाई निरन्तरता दिँदै आएका छन्। यसअघि पनि उनले “न्हापाङ्गुपला” नामक नेवारी एल्बम सार्वजनिक गरिसकेका थिए। उक्त एल्बममा समावेश “धेप मैं” भन्ने भक्तपुरेली ठेट लवजको गीतले युट्युबमा राम्रै चर्चा पाएको छ।
कर्माचार्यले गाउने मात्र नभई आफ्नै गीतका शब्द र संगीत पनि सिर्जना गर्छन्। “फुर्सदको समयमा संगीत सिर्जना गर्दा कामको थकान र मानसिक तनाव हट्छ,” उनले बताए।
“आफ्नो मान्छे” गीत युट्युबमा सार्वजनिक भएको छोटो समयमै उल्लेख्य भ्युज पाइरहेको छ भने टिकटकमा समेत रुचाइँदै गएको छ। उनले चाँडै नै आफ्नै शब्द, संगीत र स्वरमा नयाँ नेपाली एल्बम सार्वजनिक गर्ने योजना बनाइरहेको जानकारी दिएका छन्।
