काठमाडौं, भदौ ६ । काठमाडौँको पिङ्गलास्थानस्थित ‘स्टुडियो थिएटर’मा पाँच दिने दोस्रो विद्यालयस्तरीय राष्ट्रिय नाटक महोत्सव भव्य रूपमा सम्पन्न भएको छ। कवि तथा अभिनेता विजय बरालको प्रमुख आतिथ्यमा भदौ २ गते उद्घाटन भएको महोत्सव शुक्रबार विभिन्न विद्यालयका विद्यार्थीहरूले प्रस्तुत गरेका नाटकसहित समापन भएको हो।
समापन कार्यक्रममा सहभागी विद्यार्थीहरूलाई प्रमाणपत्र वितरण गरिएको थियो। कार्यक्रममा वक्ताहरूले साहित्य, सङ्गीत, कला र संस्कृतिलाई मानव जीवनका अभिन्न अङ्ग मान्दै, विद्यालय तहकै विद्यार्थीहरूले अभिनयात्मक कला सिक्नु अपरिहार्य रहेको र नाटकजस्ता संवादात्मक प्रस्तुतिले सिकाइमा सहजीकरण गर्ने भएकाले यस किसिमको महोत्सवको आयोजना आवश्यक रहेको बताए।
महोत्सवमा ‘थिएटर इन एजुकेसन’ कार्यक्रम अन्तर्गत नाट्य विधा अध्ययन गराउने देशभरका १७ वटा विद्यालयका १७ वटा नाटक मञ्चन भए। प्रस्तुत नाटकहरूमा ‘इच्छा भर्सेस समय’, ‘गीता’, ‘बैमानी काल’, ‘यशस्वी भवः’, ‘द टेल अफ इन्द्रजात्रा’, ‘पार्वती’, ‘समीर नाचेको दिन’, ‘The Greek Mythology OlymPiaganza’, ‘परदेशको स्कुल’, ‘सपनासँगको शून्यता’, ‘द जोय माछाको रंगीन सपना’, ‘The internet is a Distract – Oh look, a kitten!’ र ‘मोक्षको मार्ग’ लगायतका नाटकहरू प्रदर्शन गरिएको थियो।
समापन कार्यक्रममा नेपाली चलचित्र निर्देशक तथा पटकथा लेखक प्रदीप भट्टराईसहित विभिन्न क्षेत्रका कलाकारहरू उपस्थित थिए। यसअघि राष्ट्रिय नाटक महोत्सवको पहिलो संस्करण पनि सफलतापूर्वक सम्पन्न भएको थियो।
