काठमाडौं, फागुन ३ । वाणिज्य, आपूर्ति तथा उपभोक्ता संरक्षण विभागले बाहरसिङ्घे ब्राण्डका २१ सय म्याद नाघेका कार्टन बरामद गरेको छ । क्लाइम्याक्स ट्रेडिङ प्रालिको गोदामबाट याक ब्रुअरी कम्पनीले उत्पादन गरेको बहरसिङ्गे ब्राण्डको बियर बरामद गरेको विभागले जनाएको छ ।
म्याद नाघेका बियर भेटिएपछि विभागको निरीक्षण टोलीले गोदाममा सिल गरेको थियो । वाणिज्य, आपूर्ति तथा उपभोक्ता संरक्षण विभागका प्रवक्ता होमनाथ भट्टराईले ६५० एमएल र ३३० एमएलका बोतलमा ६० लाख रुपैयाँ बराबरको बियर बरामद गरिएको जानकारी दिए ।
रात्रिकालीन रेष्टुरेन्ट व्यवसायमा म्याद नाघेका उपभोग्य वस्तुको कारोबार हुने गरेको सूचनाका आधारमा विभागका अधिकारीले छापा मारेका हुन् । म्याद नाघेको बियर बिक्री गर्ने कम्पनीलाई कानुनबमोजिम कारबाही गरिने विभागले जनाएको छ ।
