काठमाडौं, फागुन ३ । सीता एयरलाइन्सले दाङको टरिगाउँ विमानस्थलबाट आजदेखि व्यावसायिक उडान सुरु गरेको छ ।
नेपाल नागरिक उड्डयन प्राधिकरणका सूचना अधिकारी ज्ञानेन्द्र भुलले जनवरीमा परीक्षण उडान गरेका एयरलाइन्सले सातामा तीन उडान गर्न अनुमति लिएको बताए । सीता एयरलाइन्सले सोमबार, बुधबार र शनिबार उडान गर्नेछ ।
‘यसअघि नेपाल वायुसेवा निगमले यो गन्तव्यमा नियमित उडान गर्दै आएको थियो । अब निजी एयरलाइन्सले पनि यो गन्तव्यमा नियमित उडान सेवा दिन थालेका छन्,’ सूचना अधिकारी भुलले भने, ‘सीता एयरलाइन्सले उडान सुरु गरेपछि यात्रु सेवा थप विस्तार हुने देखिएको छ ।
हाल नेपाल वायुसेवा निगमले १९ सिट क्षमताको ट्विनअटर जहाजबाट आइतबार, मंगलबार, बिहीबार र शनिबार यो गन्तव्यमा उडान भर्दै आएको छ ।
क्यानका अनुसार यो गन्तव्य उडानको एकतर्फी भाडा रु ५ हजार ८ सय ६५ रहेको छ ।
सन् १९६१ देखि सञ्चालनमा आएको यस विमानस्थलको लम्बाइ ७५० मिटर र चौडाइ ३० मिटर रहेको छ । यस विमानस्थलमा डोर्नियर, ट्विनअटर लगायतका शृंखलाका विमानहरू उडान र अवतरण गर्ने क्षमता छ। सीता एयरलाइन्सको डोर्नियर विमानमा उडान हुनेछ ।
