काठमाडौं, फागुन २ । काठमाडौं उपत्यकामा यातायात मजदुरले आह्वान गरेको सार्वजनिक यातायात बन्द कार्यक्रम फिर्ता गर्ने सहमति भएको छ ।
भौतिक पूर्वाधार तथा यातायातमन्त्री श्रेष्ठसँग आज सिंहदरबारमा भएको वार्तामा सार्वजनिक यातायात बन्दको कार्यक्रम फिर्ता लिने सहमति भएको मन्त्री नारायणकाजी श्रेष्ठको सचिवालय सदस्य विजय गौतमले जानकारी दिए ।
यसअघि यातायात व्यवसायीले नयाँ ट्राफिक नियम सार्वजनिक यातायातको हितमा नभएको तर्क गरेका थिए । ट्राफिक प्रहरीले ट्राफिक नियम उल्लंघन गर्नेलाई जरिवाना बढाउने निर्णय गरेको विरोधमा सोमबार साँझ यातायात मजदुर सडकमा उत्रिएर झडप, तोडफोड र आगजनी गरेका हुन् । उनीहरुले नयाँ बसपार्क नजिकै रहेको लोत्से मलमा समेत तोडफोड गरेका छन् ।
त्यसैगरी प्रदर्शनकारीले बालाजु चोकमा रहेको अस्थायी प्रहरीको बिटमा आगजनी गरेको प्रहरी वरिष्ठ उपरीक्षक हिमालयकुमार श्रेष्ठले जानकारी दिए ।
