चीनद्वारा आफ्ना नागरिकहरूलाई अमेरिका यात्रा गर्नुअघि सावधानी अपनाउन आग्रह

काठमाडौं, चैत २८ । अमेरिकासँग बढ्दो व्यापार युद्धको बीचमा चीनले आफ्ना नागरिकहरूलाई अमेरिका यात्रा गर्नुअघि सावधानी अपनाउन आग्रह गरेको छ।

चीनको संस्कृति तथा पर्यटन मन्त्रालयले सार्वजनिक गरेको ट्राभल एडभाइजरीमा नागरिकहरूलाई ‘सावधानीपूर्वक यात्रा गर्न’ र अमेरिका जानुअघि ‘सम्भावित जोखिमको पूर्ण मूल्यांकन गर्न’ सुझाव दिइएको छ।

यस एडभाइजरीमा चीन–अमेरिका बीचको बिग्रँदो आर्थिक र व्यापारिक सम्बन्ध तथा संयुक्त राज्य अमेरिकाको आन्तरिक सुरक्षाको अवस्थालाई कारण देखाइएको छ।

यससँगै, चीनको शिक्षा मन्त्रालयले पनि अर्को एड्भाइजरी जारी गर्दै अमेरिकी विश्वविद्यालयमा पढ्न चाहने विद्यार्थीलाई ‘सुरक्षासम्बन्धी जोखिमको मूल्यांकन’ गर्न आग्रह गरेको छ।

भन्सार शुल्कलाई लिएर अमेरिका र चीनबीच द्वन्द्व चर्किंदै गएको छ। चीनले अमेरिकाबाट आयात हुने वस्तुहरूमा ८४ प्रतिशत ट्यारिफको घोषणा गरिसकेको छ भने अमेरिकी राष्ट्रपति डोनाल्ड ट्रम्पले चीनका वस्तुहरूमा १२५ प्रतिशत ट्यारिफ लगाइसकेका छन्।

यसको जवाफमा चीनका राष्ट्रपति सी जिनपिङले भनेका छन्, ‘अमेरिकाको भन्सार शुल्कको सामना गर्न चीनले आफ्ना छिमेकीहरूसँग सम्बन्ध बलियो बनाउनु आवश्यक छ।’

ट्रम्पले १२५ प्रतिशत भन्सार शुल्क लगाएपछि चीनले पनि तत्काल कठोर प्रतिक्रिया दिइसकेको छ।

बीबीसीका अनुसार एक चिनियाँ अधिकारीले ‘चीन चुप लागेर नबस्ने’ प्रतिक्रिया दिएका हुन् ।

अमेरिकाले चीनमा १०४ प्रतिशत भन्सार शुल्क लगाउने घोषणा गरेपछि चीनले जवाफी कदमस्वरूप अमेरिकाबाट आयात हुने वस्तुहरूमा भन्सार शुल्क ३४ प्रतिशतबाट बढाएर ८४ प्रतिशत पुर्‍याउने निर्णय गरेको थियो।

चीनको यो कदमपछि ट्रम्पले थप कडा प्रतिक्रिया दिँदै चिनियाँ वस्तुहरूमा आयात शुल्क १०४ प्रतिशतबाट बढाएर १२५ प्रतिशत पुर्‍याएका हुन्।

चीनको सरकारी समाचार संस्था सिन्ह्वाले वाणिज्य मन्त्रालयका एक अधिकारीलाई उद्धृत गर्दै लेखेको छ, ‘जब चिनियाँ जनताको अधिकार र हितमा चोट पुग्छ, त्यस्तो अवस्थामा सरकार चुप लागेर बस्दैन।’

चीनको एक सरकारी पत्रिकाले सम्पादकीयमा लेखेको छ, ‘विश्वव्यापी ऐक्यबद्धताले व्यापारिक दादागिरीमाथि जित हासिल गर्न सक्छ।’

उक्त लेखमा जापान, दक्षिण कोरिया र अन्य एशियाली अर्थतन्त्रहरूसँग बेइजिङको सहकार्यबारे पनि उल्लेख गरिएको छ।