काठमाडौं, माघ २७ । सत्तारुढ गठबन्धनको उच्चस्तरीय राजनीतिक संयन्त्रको बैठक आज बस्दैछ । बालुवाटारमा बसेको बैठकमा सत्तारुढ दलका शीर्ष नेताहरु सहभागी छन् । संयन्त्रको बैठकमा राष्ट्रपतिको निर्वाचनका साथै पछिल्लो राजनीतिक घटनाक्रमका बारेमा पनि छलफल हुने बताइएको छ ।
बिहीबारका लागि बोलाइएको संयन्त्रको बैठक संयन्त्रका संयोजक तथा नेकपा एमालेका अध्यक्ष केपी शर्मा ओली र प्रधानमन्त्री दाहालबीच भएको भेटपछि शुक्रबार बिहानसम्मका लागि सारिएको हो । ओलीसँगको भेटपछि पत्रकारसँगको संक्षिप्त कुराकानीमा प्रधानमन्त्रीले शुक्रबार बिहान संयन्त्रको बैठक बस्ने बताए ।
माओवादी केन्द्रको नेतृत्वमा नयाँ सरकार गठनका लागि मङ्सिर २५ गते भएको सहमतिअनुसार पार्टीले सभापति पाउनुपर्ने सत्तारुढ एमालेको दाबी छ । तर माघ १० गते प्रधानमन्त्री दाहाललाई नेपाली कांग्रेसले पनि विश्वासको मत दिएको थियो । यस्तो अवस्थामा माओवादीले राष्ट्रपतिमा राष्ट्रिय सहमति खोज्नुपर्ने तर्क गर्दै आएका छन् ।
