काठमाडौं, मंसिर २० । टिकटकले पछिल्लो दुई महिनामा नेपालमा आफ्नो कम्युनिटी गाइडलाइन्स उल्लंघन गर्ने ६ हजार ७८ भिडिओ हटाएको छ । अप्रिल र जुन महिनामा पोस्ट गरिएका ती भिडियोमध्ये ९९.१ प्रतिशत भिडिओ तत्कालै हटाइएको र ९३.२ प्रतिशत २४ घण्टाभित्रै हटाइएको टिकटकका प्रतिनिधिले जानकारी दिएका छन् ।
मंगलबार काठमाडौंमा सञ्चार तथा सूचना प्रविधि मन्त्रालयको समन्वयमा टिकटकले आयोजना गरेको एक कार्यक्रममा यो तथ्याङ्क प्रस्तुत गरिएको हो । कार्यक्रममा टिकटककी प्रतिनिधि सिद्रा जलिलले कम्पनीले विकास गरेको नियामक निर्देशिकाबारे कार्यपत्र प्रस्तुत गरिन् ।
उनले टिकटकलाई मर्यादित र व्यवस्थित बनाउनका लागि उमेर समूहको वर्गीकरण गरिएको बताइन् । निर्देशन अनुसार टिकटकमा डाइरेक्ट मेसेज पठाउन प्रयोगकर्ताको उमेर कम्तीमा १६ वर्ष र लाइभ स्ट्रिमिङका लागि १८ वर्ष हुन आवश्यक छ ।
जलिलले सामाजिक सञ्जालको सही प्रयोगबारे सचेतना कमी भएकाले निर्देशिका पूरा रूपमा पालना नगरिएको धारणा राखिन् ।
कार्यक्रममा टिकटकका साउथ एसिया पब्लिक पोलिसी तथा गभर्नमेन्ट रिलेसन प्रमुख फोर्डस मोटाकिनले नेपाल सरकारसँग सहकार्य गरी डिजिटल सचेतना र अनलाइन सुरक्षालाई प्रवर्द्धन गर्ने प्रतिबद्धता व्यक्त गरे । उनले विशेषगरी बालबालिका र युवा प्रयोगकर्ताको सुरक्षाका लागि निर्देशिका तयार पारिएको र सुरक्षित अनलाइन वातावरण निर्माणका लागि केही सावधानी अपनाइए पनि अझै काम गर्न बाँकी रहेको बताए ।
