पोखरा, माघ २२ । होटल एसोसिएसन अफ नेपाल (हान) पोखरा शाखाले नेपाललाई पर्यटकीय गन्तव्य सूचीमा समावेश गर्न पहल गर्न काठमाडौंस्थित चिनियाँ दूतावासलाई आग्रह गरेको छ ।
नेपालका लागि चिनियाँ राजदूत चेन सोङलाई पठाएको अनुरोध पत्रमा हानका अध्यक्ष लक्ष्मण सुवेदीले सन् २०२३ मा चिनियाँ पर्यटकलाई नेपालमा स्वागत गर्न पर्यटन व्यवसायी तयार र आशावादी रहेको बताए । पत्रमा सुवेदीले चीन सरकारको पर्यटकीय गन्तव्य सूचीमा नेपाल नपरेको थाहा पाउँदा हान दुःखी भएको उल्लेख गरेका छन् ।
कोभिड–१९ महामारीको तीन वर्षपछि चीन सरकारले आफ्ना नागरिकका लागि पर्यटकीय गन्तव्यका रूपमा २० देशको नाम सार्वजनिक गरेको छ । दूतावासलाई लेखेको पत्रमा हानले चिनियाँ पक्षलाई आफ्नो निर्णयमा पुनर्विचार गर्न र नेपाललाई पर्यटकीय गन्तव्य मुलुकको सूचीमा समावेश गर्न आग्रह गरेको छ ।
संघको पत्रमा चिनियाँ राजदूतले सकारात्मक प्रतिक्रिया दिएको सुवेदीले बताए ।
