काठमाडौं, माघ २१ । प्रधानमन्त्री पुष्पकमल दाहाल प्रचण्डले उचित मूल्य नपाएको भन्दै हजारौं टन तरकारी सडकमा फ्याँक्ने आन्दोलनरत किसानको समस्यालाई उचित सम्बोधन गर्न कृषि तथा पशुपन्छी विकास मन्त्रालयको ध्यानाकर्षण गराउनुभएको छ ।
प्रधानमन्त्री दाहालले किसानका माग सम्बोधन गर्न आवश्यक कदम चाल्न निर्देशन दिएका छन् ।
तरकारी तथा अन्य कृषि उपजको उचित मूल्य नपाएको भन्दै चितवनका किसानले तरकारी सडकमा फालेपछि प्रधानमन्त्री दाहालले माग सम्बोधन गर्न कृषि तथा पशुपन्छी विकासमन्त्री ज्वालाकुमारी साहको ध्यानाकर्षण गराए ।
प्रधानमन्त्री दाहालले चितवनमा रहेका मन्त्री साहलाई सरोकारवाला किसानसँग छलफल गरी यसबारे जानकारी दिन पनि निर्देशन दिएका छन् ।
प्रधानमन्त्रीको निर्देशनपछि मन्त्री शाहले सम्बन्धित किसानसँग छलफल गरी समस्या समाधानका लागि आवश्यक पहल गर्ने र थप नीतिगत सहयोग आवश्यक परे प्रधानमन्त्रीसँग अनुरोध गर्ने बताइन् ।
कृषिमन्त्री सरोकारवाला किसानसँगको छलफल सकेर फर्केपछि प्रधानमन्त्रीले मन्त्री, सचिव र अन्य सरकारी अधिकारीलाई थप छलफलका लागि बोलाउने तयारी पनि गरेका छन् ।
