यो वर्षको तिहारमा काठमाडौँमा देउसी भैलो खेल्ने समय लम्बाएको छ। अब काठमाडौँ महानगरपालिकामा राती १ बजेसम्म देउसी भैलो खेल्न पाइने भएको छ ।
तिहारमा खेलिने देउसी भैलोका लागि पछिल्लो समय प्रशासनले समय सीमा तोक्ने गरेको छ।
यसपालि काठमाडौं उपत्यका (काठमाडौं, ललितपुर र भक्तपुर) बाहेक अन्यत्र प्रशासनले सूचना जारी गरेर देउसी भैलो खेल्न समय तोकेका छन्।
काठमाडौँ महानगरपालिकाका मेयर बालेन्द्र शाह (बालेन)ले शुक्रवार सामाजिक सञ्जालमार्फत यस्तो जानकारी दिएका हुन् । गत वर्षसम्म कोभिड महामारीका कारण राती ९ बजेसम्म खेल्न पाइएको भए पनि यस वर्ष भने राती १ बजेसम्म खेल्न पाइने भएको छ ।
मेयर बालेनको स्ट्याटस यस्तो छ
बिगतको बर्षहरुमा कोभिडको कारण तथा सुरक्षाको कारणले गर्दा तिहारमा देउसी भैलो खेल्ने समय काठमाडौ महानगर भित्र राती ९ बजे सम्म मात्र खेल्न अनुमती दिइएको थियो । यो बर्ष काठमाडौ महानगर नगर प्रहरीले राती १ बजेसम्म सुरक्षाको लागि पेट्रोलिङको ब्यबस्था मिलाएको छौ र सोही समयसम्म मर्यादित भएर देउसी भैलो खेलीदिनु हार्दिक अनुरोध गर्दछौ , सोही अनुरुप नेपाल प्रहरी तथा जिल्ला प्रशासन कार्यालयलाई सुरक्षाको प्रबन्ध मिलाउन हार्दिक अनुरोध गर्दछौ।
