काठमाडौं , असोज २९ । घटस्थापनाको भोलिपल्ट अर्थात आज असोज २९ गते सोमवारदेखि नयाँ नेपाली नोट साट्न पाइने भएको छ । महान पर्व बडादशैँ, दीपावली तथा र छठलाई लक्षित गरेर सोमबारदेखि नयाँ नोट साट्न पाइने भएको हो ।
नयाँ नोट साट्नका लागि नेपाल राष्ट्र बैंकले सर्वसाधारणलाई आजदेखि नयाँ नोट सटही सुविधा दिन लागेको हो । नेपाल राष्ट्र बैंकले आजदेखि काठमाडौं उपत्यकाभित्र राष्ट्र बैङ्क अन्तर्गतको मुद्रा व्यवस्थापन विभाग तथा विभिन्न वाणिज्य बैंकका शाखामार्फत नयाँ नोट सटही गर्ने सुविधा दिने छ ।
उपत्यका बाहिर राष्ट्र बैंकको प्रदेशस्थित कार्यालय तथा विभिन्न वाणिज्य बैंकका शाखा कार्यालयमा नयाँ नोट साट्न सकिने छ ।
राष्ट्र बैंकले हरेक वर्ष दशैँअघि नयाँ नोट सटहीको सुविधा दिँदै आएको छ । यो वर्ष पनि राष्ट्र बैंकले ५, १०, २०, ५० तथा एक सय रुपैयाँका नोट साट्ने व्यवस्था मिलाएको छ ।
राष्ट्र बैंकले प्रति व्यक्ति १८ हजार ५ सय रुपैयाँको दरले नयाँ नोट सटहीको व्यवस्था मिलाइएको छ ।
