काठमाडौं, असोज १९ । त्रिभुवन अन्तर्राष्ट्रिय विमानस्थलमा रहेको भन्सार कार्यालयले विदेशबाट आउने यात्रु तथा विदेशमा बस्ने नेपाली नागरिकले आफ्नो व्यक्तिगत प्रयोजनका सामान आफूसंगै ल्याउँदा तथा कार्गोमार्फत आफ्ना परिवारलाई पठाउँदा इमरजेन्सी लाइट, पावर ब्याकअप, आइरन, हेयर ड्रायर, मिक्सर र पानी तान्ने मेशिनसमेत पठाउने गरेको पाइएको जनाएको छ ।
भन्सार कार्यालयले त्यस्ता सामानहरु एक्स रे मेशिनमा हेर्दा शंकास्पद देखिने र जाँचपासका क्रममा ब्याग खोलर, फुटाएर चेकजाँच गर्नुपर्ने अवस्था सिर्जना हुने गरेको उल्लेख गरेको छ ।
यसबाट सेवाग्राहीलाई धेरै क्षति पनि पुगेका कार्यलयले सूचनामा उल्लेख गर्दै भनेको छ– ‘त्यसैले विदेशबाट नेपाल आउँदा तथा नेपालमा रहेका परिवारलाई सामान पठाउँदा उल्लेखित सामान नपठाउन र नल्याउन अनुरोध गरिन्छ ।’
त्रिभुवन विमानस्थल भन्सार कार्यालयले जाँचपासको क्रममा शंकास्पद देखिने सामानको सूचीसहित नल्याउन र नपठाउन अनुरोध गरेको हो ।
Published Date: 06 October 2023
