मुम्बई, असोज १९ । बलिउड अभिनेता अमिताभ बच्चन एउटा विज्ञापनका कारण विवादमा घेरिएका छन् । अमिताभले उक्त विज्ञापन अनलाइन रिटेल पोर्टल फ्लिपकार्टका लागि गरेका थिए ।
उक्त विज्ञापनमा अमिताभले ‘यो सेलमा स्पेशल मोबाइल फोन डील्स तथा यस्ता अफरहरु पाइनेछ, जुन रिटेल स्टोरमा उपलब्ध छैन’ भन्नु नै भारी परेको छ ।
स्मार्टफोनका रिटेलरहरुले अमिताभ बच्चनको उक्त विज्ञापनको आलोचना गरेका छन् । यस बारेमा अमिताभविरुद्ध गुनासो पनि दर्ता गराएका छन् । स्मार्टफोन रिटेलरहरुले विज्ञापनले खरिदकर्तालाई झुक्याएको आरोप लगाएका छन् । अल इन्डिया मोबाइल रिटेलर्स एसोसिएशनले यस बारेमा स्मार्टफोन ब्राण्डलाई एउटा चिठ्ठि लेखेको छ ।
त्यस्तै सीएआइटीले कम्पनी र अमिताभविरुद्ध सीसीपीएमा झुठो दावी गरेको आरोप लगाएको मुद्दा दर्ता गराएको छ । उनले उक्त विज्ञापनलाई देशका साना व्यापारीविरुद्ध भएको बताएका छन् । यसका साथै विज्ञापन फिर्ता गर्नु पर्ने माग गरेका छन् । कन्फेडरेशन अफ अल इन्डिया ट्रेडर्सले सीसीपीएबाट पेना ल्टी लगाउन अनुरोध गरेको छ ।
क्लिपकार्टले चाडपर्वको पूर्व सन्ध्या पारेर ‘द बिग बिलियन डेज’ सेल प्रारम्भ गर्न थालेको छ । यहि कारणले कम्पनीको उक्त विज्ञापन भाइरल भइरहेको छ ।
अमिताभको विज्ञापनमा विवाद भएपछि कम्पनीले आफ्नो यूट्यूब च्यानलमा उक्त विज्ञापनलाई प्राइभेट गरेको छ ।
