काठमाडौँ, भदौ २४ । पाटनको मयूरवर्ण महाविहार, भिन्छे बहा:ले शनिबार दोस्रो अन्तर महाविहार बज्राचार्य फुट्सल प्रतियोगिता २०८० को उपाधि जितेको छ । मयूरवर्ण महाविहारले फाइनलमा श्रीखण्ड तरमूल महाविहारलाई हरायो ।
बज्राचार्य क्लबद्वारा चौर रिक्रियसनल सेन्टर, बांसबारीमा आयोजना भएको प्रतियोगितामा रत्नकेतु महाबिहार, झ्वा: बा:ले तेस्रो स्थान हासिल गर्यो । प्रतियोगिताको विजेता मयूरवर्णले ट्रफीसहित ५० हजार रुपियाँ प्राप्त गर्यो । उपविजेता श्रीखण्डले २५ हजार र तेस्रो हुने रत्नकेतुले १५ हजार रुपियाँमा चित्त बुझाए ।
सो प्रतियोगितामा विजेता टिमका आयुष बज्राचार्य उत्कृष्ट खेलाडी र नवीन बज्राचार्य उत्कृष्ट गोलरक्षक चुनिए । आयुष १३ गोलसहित सर्वाधिक गोलकर्ता पनि बने । यसैगरी, किर्तिपुण्य बज्रधातु चैत्य महाविहार, लगं बहा:लाई फेयर प्ले टिम घोषित गरियो ।
बज्राचार्य क्लबका अध्यक्ष सर्जु बज्राचार्य एवं बागमती प्रदेशका माननीय शैलेन्द्रमान बज्राचार्य तथा प्रमुख अतिथि चर्यानृत्य गुरु प्रज्वलरत्न बज्राचार्य संयुक्त रूपमा अवार्ड, प्रमाणपत्र प्रदान गर्दै सम्मान गरेको थियो । प्रतियोगिताका संयोजन मोनिस मानन्द बज्राचार्यले गरेका थिए ।
Published Date: 10 September 2023
