काठमाडौं, साउन ३० । यस वर्ष मुलुकभर ८७ प्रतिशत धान रोपाइँ भएको छ ।
कृषि तथा पशुपन्छी विकास मन्त्रालयले साउन २६ गतेसम्मको तथ्यांकले ८७ प्रतिशत जमिनमा धान रोपाइँ सम्पन्न भएको जनाएको छ । यो अघिल्लो आवको सोही अवधिको तुलनामा सात प्रतिशतले कम हो ।
साउन २६ गतेसम्म १४ लाख हेक्टर जमिनमा धान रोपाइ सकिएको र यो कुल खेतीयोग्य जमिनको ८७ प्रतिशत रहेको मन्त्रालयका प्रवक्ता सबनम शिवाकोटीले जानकारी दिए।
यस वर्ष मधेस प्रदेश, वाग्मती प्रदेश र गण्डकी प्रदेशमा मनसुन ढिलो भएकाले धान रोपाइँ खुम्चिएको छ ।
साउन महिनाको अन्त्यसम्म धान रोपाइँ चल्छ । तर, मन्त्रालयले यो महिनाको अन्त्यसम्म ९२ देखि ९५ प्रतिशत धान रोप्ने अपेक्षा गरेको छ ।
कोशी प्रदेशमा ९४ प्रतिशत र मधेशमा ६८ प्रतिशत मात्रै धान रोपिएको अधिकारीहरुले बताएका छन् । गण्डकी प्रदेशले ९३ प्रतिशत धान रोपेको छ भने कर्णाली प्रदेशमा ९८ प्रतिशत, लुम्बिनी प्रदेशमा ९३ प्रतिशत र सुदूरपश्चिम प्रदेशमा ९९ प्रतिशत पुगेको छ ।
