भारत, पुष २२। एजेन्सी । जेम्स क्यामरुनको अवतार २ ले भारतीय बक्स अफिसमा शानदार व्यापार गरिरहेको छ । अवतार २, यसअघि प्रदर्शनमा आएको एभेन्जर्सः एन्डगेमपछि भारतमा ३ सय करोडको आँकडा पार गर्ने एकमात्र हलिउड फिल्म बनेको छ ।
सो फिल्मले भारतमा अहिलेसम्ममा ३ सय ३० करोडको व्यापार गरिसकेको छ । भारतका थिएटरमा रिलिज भएको १८ दिनको अवधिमा अवतार २ ले ३ अर्ब ३१ करोड ५० लाख रुपैयाँ आम्दानी गरिसकेको छ । सो फिल्मले १८ औं दिनमा ५ दशमलव ५० करोड रुपैयाँ कमाएको छ । भारतीय फिल्म समीक्षकका अनुसार यो चाँडै भारतको सबैभन्दा ठूलो हलिउड फिल्मको रुपमा देखा पर्नेछ ।
भारतीय सञ्चार माध्यमका अनुसार एभेन्जर्स एन्डगेम भारतमा सबैभन्दा धेरै कमाउने हलिउड फिल्म हो । सो फिल्मले भारतमा ३६५ करोड रुपैयाँ कमाएको थियो । अब अवतार २ ले भारतमा यो आंकडा पार गर्न सक्छ कि सक्दैन त्यो हेर्न बाँकी नै छ । यस फिल्मले विश्वव्यापी रुपमा १ दशमलव ४ बिलियन डलर कलेक्सन गरिसकेको छ ।
भारतीय सञ्चार माध्यमका अनुसार यस फिल्मको वितरण अधिकार १५० करोडमा बिक्री भएको थियो । योसँगै फिल्मको कमाई ३३० करोडभन्दा माथि पुगेको छ । अर्थात् फिल्मले भारतमा शतप्रतिशत नाफा कमाएको छ । अवतार २ ले हालसम्म १०८.६६ प्रतिशत नाफा कमाएको छ ।
