झापा, साउन १० । युवा रोजगारीका लागि वैदेशिक रोजगारीमा जाने र ग्रामीण क्षेत्रका जग्गा बाँझो रहेकाले गत आर्थिक वर्षमा भारतबाट ५१ करोड ३० लाख रुपैयाँ बराबरको कोदो आयात भएको छ ।
आर्थिक वर्ष २०७९/८० मा काँकडभिट्टा भन्सार नाकाबाट कोदो आयात ५१ करोड ३० लाख पुगेको थियो ।
काँकडभिट्टास्थित प्लान्ट क्वारेन्टाइन कार्यालयका सूचना अधिकारी चन्द्रकिशोर ठाकुरका अनुसार काँकडभिट्टा भन्सार नाकाबाट १६ हजार ३५ मेट्रिक टन कोदो आयात भएको थियो ।
त्यस्तै, गत आर्थिक वर्षमा काँकडभिट्टा भन्सार नाकाबाट भारतबाट ५७ करोड ७७ लाख रुपैयाँको कुदुवा आयात भएको ठाकुरले जानकारी दिए ।
त्यसैगरी आर्थिक वर्ष २०७९/८० मा काँकडभिट्टा भन्सार नाकाबाट करिब २० करोड रुपैयाँ बराबरको खुर्सानी आयात भएको ठाकुरले बताए ।यस अवधिमा भारतबाट अर्बौंको प्याज, टमाटर, लङगार्ड, तरुल, तरबूज, अदुवालगायत फलफूल तथा तरकारी आयात भएको ठाकुरले बताए ।
तर, भारतलगायत अन्य मुलुकबाट तरकारी तथा फलफूलको आयात प्रतिबन्ध नहुँदा स्वदेशी उत्पादनको बजार सीमित भएको पूर्वी जिल्लाका स्थानीय उत्पादकहरुको गुनासो छ ।
Published Date: 26 July 2023
