काठमाडौं, असार ३१ । साउन महिनाको लागि वाणिज्य बैंकहरुले नयाँ ब्याजदर सार्वजनिक गरेका छन् । वाणिज्य बैंकहरुले लामो समयदेखि भद्र सहमतिका नाममा गर्दै आएको ‘ब्याजदर कार्टेलिङ’ को अन्त्य गरेसँगै साउनका लागि बैंकहरुले फरक फरक ब्याजदर निर्धारण गरेका छन् ।
केही बैंकहरुले मुद्दति निक्षेपको ब्याजदर अघिल्लो महिनाको तुलनामा बढाएका छन् भने केही बैंकले घटाएका छन् । असारमा बैंकहरुले मुद्दति निक्षेपमा ९.९९% ब्याज दिइरहेका छन् । बैंकहरुले निक्षेपको ब्याजदर परिर्वतन गर्दा औसत १०% विन्दुले घटाउन वा बढाउन सक्ने व्यवस्था रहेको छ । सोहीअनुसार वाणिज्य बैंकहरुले असारको लागी नयाँ ब्याजदर निर्धारण गरेको छन् ।
लामो समयदेखि ‘ब्याजदर कार्टेलिङ’ गर्दै आएका बैंकहरुले चौतर्फी दबाबका बीच यसको अन्त्य गरेका छन् ।‘ब्याजदर कार्टेलिङ’ को अन्त्यले खुला अर्थतन्त्रको संकेत गर्ने जानकारहरुले बताएका छन् । नेपाल राष्ट्र बैंकका पूर्वकार्यकारी निर्देशक डा. गोपालप्रसाद भट्टले भने, ‘‘ब्याजदर कार्टेलिङ’ को अन्त्यले खुला अर्थतन्त्रको संकेत गर्छ ।’ साथै, उनले यसबाट सर्वसाधारणलाई केही फाइदा पुग्ने बताए ।
