भैरहवा, असार १४ । भैरहवामा निर्माण गरिएको पाँच चारे होटल ‘सिद्धार्थ विलासा’ बिहिबारदेखि सञ्चालनमा आएको छ ।
सिद्धार्थ बिजनेश ग्रुप अफ हस्पिटालिटीले बिहिबार पत्रकार सम्मेलनको आयोजना गर्दै आजदेखि आफ्नो पहिलो पाँचतारे लक्जरी होटल सञ्चालनमा आएको जनाएको छ । समुहको लक्जरीयस ब्राण्ड अन्तर्गत भैरहवामा पहिलो होटल ‘सिद्धार्थ विलासा सञ्चालनमा आएको हो ।
पत्रकार सम्मेलनमा होटलका अध्यक्ष चिन्तामणि न्यौपानेले आन्तरिक पर्यटक केन्द्रित सिद्धार्थ विलासा सञ्चालनमा ल्याएको बताएका छन् । न्यौपानेका अनुसार सिद्धार्थले अहिलेसम्म कटेज रेष्टुराँ, तीन तारे तथा चार तारे स्तरका होटल सञ्चालन गर्दै आएकोमा आजदेखि पाँच तारे लक्जरी होटल सञ्चालनमा ल्याएको बताए ।
साढे दुई अर्ब रुपैयाँ लगानी गरेर ४ बिघा क्षेत्रफलमा निर्माण भएको यो होटलमा ८५ वटा कोठा छन् ।
होटलका प्रमुख कार्यकारी अधिकृत कृष्ण न्यौपानेले क्यासिनोसहित सेवा प्रारम्भ भएसँगै होटलले आउँदो असोजमा ग्राण्ड ओपनिङ गर्ने बताएका छन् ।
