काठमाडौं, जेठ १८ । गैरआवासीय नेपाली संघ (एनआरएन) ले नागरिकता ऐन, २०६३ सम्बन्धी विधेयक प्रमाणीकरण भएकोमा खुशी व्यक्त गरेको छ ।
गैरआवासीय नेपाली संघका कार्यकारी अध्यक्ष डा बद्री केसीले नागरिकतासम्बन्धी विधेयक प्रमाणीकरणले नेपालको संविधान, २०७२ ले प्रत्याभूत गरेको सामाजिक–आर्थिक र सांस्कृतिक अधिकारसँगै ‘एनआरएन नागरिकता’ सुनिश्चित भएको बताए ।
विश्वभर बसोबास गर्ने नेपालीलाई मध्यनजर गर्दै एनआरएनएले सन् २००३ देखि नै यस विषयमा वकालत गर्दै आएको उनले बताए । राष्ट्रपतिको कदमले यसलाई राम्रोसँग सम्बोधन गरेको छ, केसीले थपे।
“राष्ट्रपति पौडेलको यो कदमले ‘एकपटक नेपाली : सदाका लागि नेपाली’ भन्ने नारालाई सार्थक बनाउने विश्वास लिएको छ,’ अध्यक्ष केसीले यसले विश्वका धेरै देशमा रहेका सबै नेपालीलाई नेपालसँग जोड्ने र आफ्नो ज्ञान, सीप र पूँजी नेपालमा हस्तान्तरण गर्ने विश्वास व्यक्त गरे ।
साथै, एनआरएनए अध्यक्षले हालैको यो कदमले नेपालमा एनआरएनको सम्पत्तिको संरक्षण गर्ने र लगानीलाई प्रोत्साहन गर्ने वातावरण सिर्जना गर्ने बताए ।
यसका लागि एनआरएनएले प्रधानमन्त्री, सभामुख, राष्ट्रियसभाका अध्यक्ष, राजनीतिक दल र कानुनविद्लाई धन्यवाद दिएको छ ।
राष्ट्रपति पौडेलले बुधबार नेपाल नागरिकता ऐन, २०६३ संशोधन विधेयक प्रमाणीकरण गरेका हुन्।
