काठमाडौं, जेठ ७ । काठमाडौं महानगरपालिकाले तोकिएको अस्पतालमा निःशुल्क उपचार गराएका गरिब, असहाय र परित्याग भएका व्यक्तिको विवरण प्रत्येक महिना पूरा भएको १० दिनभित्र महानगरपालिकामा पेश गर्न महानगरका अस्पतालहरूलाई निर्देशन दिएको छ ।
महानगरपालिका अन्तर्गतको स्वास्थ्य विभागले लक्षित समूहका लागि १० प्रतिशत शय्या आरक्षित गर्नेबारे सम्बन्धित अस्पतालले जारी गरेको सूचनालाई कार्यान्वयन गरी प्रत्येक महिना अन्त्य भएको १० दिनभित्र विवरण बुझाउन कामनपाले निर्देशन दिएको छ ।
“स्वास्थ्य संस्था सञ्चालन मापदण्ड, २०७७ को परिच्छेद २४ को दफा ७० (डी) बमोजिम अस्पतालले १० प्रतिशत शैया छुट्याई गरिब, असहाय र परित्याग भएका व्यक्तिलाई निःशुल्क उपचार उपलब्ध गराउनु पर्नेछ । लक्ष्यको विवरण सार्वजनिक गर्न स्वास्थ्य संस्थाहरूलाई आग्रह गर्दछु । लाभग्राहीले प्रत्येक महिना सकिएको १० दिनभित्र आफ्नो विवरण कामपामा बुझाउनुपर्छ, नत्र कारबाही हुन्छ,’ मेयर बलेन्द्र शाहले भने ।
विभागले मापदण्ड नपुगेको भन्दै सूचना जारी गरेको थियो । स्वास्थ्य संस्थालाई सेवाग्राहीमैत्री सेवा उपलब्ध गराउन, कर्मचारीलाई न्यूनतम पारिश्रमिक उपलब्ध गराउन, फोहोरमैला व्यवस्थापन गर्न, अस्पतालभित्रका क्यान्टिन सफा र गुणस्तरीय खाना उपलब्ध गराउन स्वास्थ्य संस्थालाई आग्रह गरेको छ।
