काठमाडौं, जेठ ७ । नेकपा (एमाले)का अध्यक्ष केपी शर्मा ओलीले संघीय संसदमा दलका सांसदहरुको उपस्थिति सन्तोषजनक नभएको गुनासो गरेका छन् ।
सरकारको आर्थिक वर्ष २०२३/२४ को नीति तथा कार्यक्रम संघीय संसदमा पेश भएको भोलिपल्ट शनिबार संसदीय दलको बैठकमा ओलीले आफ्ना सांसदहरुप्रति असन्तुष्टि जनाएका हुन् ।
संसदीय दलको बैठकमा ओलीले भने, ‘संसदमा हाम्रो उपस्थिति कमजोर भएको छ, ‘नुन खाएको कुखुरा जस्तै एमाले किन सुकेको छ ?
सङ्घीय संसद्को बैठकमा प्रभावकारी उपस्थिति सुनिश्चित गर्न निर्देशन दिँदै एमाले अध्यक्ष ओलीले भने, ‘विचार, विधि र प्रस्तुति नयाँ नभए पार्टी पुरानो हुन्छ, तर विचार र जोशमा हामी बलियो छौँ भन्ने मलाई लाग्छ ।
सरकारले प्रस्तुत गरेका नीति तथा कार्यक्रमलाई समर्थन गर्न लायक नभएको बताउँदै ओलीले भने, ‘देशको राजनीतिक, आर्थिक, सामाजिक समस्याको पहिचान नीति तथा कार्यक्रमले गर्न सकेको छैन ।
सरकारको नीति तथा कार्यक्रममा गम्भीरता नभएको आरोप लगाउँदै ओलीले नीति तथा कार्यक्रम संविधान र देशको आवश्यकतासँग नजोडिएको आरोप लगाए ।
Published Date: 21 May 2023
