काठमाडौं, वैशाख २६ । सरकारले चालु आर्थिक वर्षमा निजामती कर्मचारीको तलब वृद्धि नगर्ने भएको छ ।
अर्थमन्त्री डा प्रकाशशरण महतले सरकारी कर्मचारीको तलब र सामाजिक सुरक्षा भत्ता नबढाइने स्पष्ट पारेका छन् । मुलुकको अर्थतन्त्र संकटग्रस्त, राजस्व सङ्कलन न्यून र सरकारसँग स्रोत सीमित भएकाले यस वर्ष तलबभत्ता र सामाजिक सुरक्षा भत्ता बढाउन नसकिने उनले बताए ।
हाल ३५ लाखभन्दा बढी नेपाली नागरिक विभिन्न सामाजिक सुरक्षा भत्ताको दायरामा छन् । सामाजिक सुरक्षा भत्ता पुनरावलोकनको दबाब बढिरहेको अवस्थामा अर्थमन्त्री डा महतले यसलाई बढाउन नसकिने र घटाउने सम्भावना पनि नरहेको स्पष्ट पारे ।
