लुम्बिनी, वैशाख २३ । प्रधानमन्त्री पुष्पकमल दाहाल प्रचण्डको आसन्न भारत भ्रमणको एजेण्डामा गौतमबुद्ध अन्तर्राष्ट्रिय विमानस्थल सञ्चालन गर्न माग गर्दै लुम्बिनी प्रदेशका व्यापारी समुदायले ध्यानाकर्षण गरेका छन् ।
शुक्रबार प्रधानमन्त्री पुष्पकमल दाहाललाई बुझाएको ज्ञापनपत्रमा उद्योगी व्यवसायीले अन्तर्राष्ट्रिय विमानस्थल पूर्णरुपमा सञ्चालनको विषय जोडदार रुपमा उठाएका छन् ।
सिद्धार्थ उद्योग वाणिज्य संघको एक प्रतिनिधिमण्डलले लुम्बिनीमा प्रधानमन्त्री दाहाललाई भेटेर विमानस्थल सञ्चालनमा सरकारको ध्यानाकर्षण गराएको हो । प्रधानमन्त्री दाहाल २५६७ औँ बुद्ध जयन्ती र २०८० लुम्बिनी दिवसमा सहभागी हुन लुम्बिनी पुगेका थिए ।
ज्ञापनपत्रमा राष्ट्रिय ध्वजावाहक नआएसम्म अन्य आन्तरिक तथा अन्तर्राष्ट्रिय वायुसेवा कम्पनीले उडान भर्न आनाकानी गर्दै आएकाले नेपाल वायुसेवा निगमले विमानस्थलबाट उडान सेवा सुरु गर्नुपर्ने ज्ञापनपत्रमा उल्लेख छ ।
निगमबाट भैरहवा–दिल्ली, भैरहवा–मलेसिया र भैरहवा–कतार उडान सुचारु गर्नुपर्ने र गौतमबुद्ध अन्तर्राष्ट्रिय विमानस्थलमा नियमित र चार्टर्ड उडानका लागि सरकारको ठोस पहल गर्नुपर्ने अन्य मागहरु रहेका छन् ।
लुम्बिनीको होटल तथा पर्यटन उद्योगमा ६० अर्बभन्दा बढीको लगानी सुरक्षित गर्ने वातावरण बनाउन पनि व्यवसायी समुदायले सरकारसँग माग गरेका छन् ।
जवाफमा प्रधानमन्त्री दाहालले व्यापार समुदायको मागप्रति आफू सकारात्मक रहेको बताउँदै भारत भ्रमणबाट फर्किएपछि निजी क्षेत्रसँगको परामर्शमा विमानस्थल सञ्चालनका लागि पहल गरिने सिद्धार्थ चेम्बर अफ कमर्शका उपाध्यक्ष गोविन्द ज्ञवालीले बताए ।
Published Date: 06 May 2023
