भक्तपुर, वैशाख १७ । भक्तपुर युवा टीम गोल्मढी भक्तपर वडा नं. ७ को आयोजनामा टीमका सदस्य तथा बुद्धिचाल खेलाडी स्व. त्रि–रत्न ग्वाछाको स्मृतिमा ‘स्वर्गीय त्रि–रत्न ग्वाछा स्मृति खुला रापिड बुद्धिचाल प्रतियोगिता–२०८०’ हुने भएको छ ।
टीमको यहि वैशाख १६ गते शनिबार बसेको बैठकले प्रतियोगिता जेठ १२ र १३ गते भक्तपुरमा गर्ने निर्णय गरेको हो । स्व. त्रि–रत्न ग्वाछाको हालै अल्पआयुमा अकल्पनीय निधन भएको थियो । उनी जिल्लाका चर्चित बुद्धिचाल खेलाडी पनि थिए ।
प्रतियोगिताका विजयी खेलाडीहरुलाई नगद पुरस्कार तथा प्रमाणपत्रको व्यवस्था रहेको टीमका अध्यक्ष केशव त्वानाबासुले जानकारी गराएका छन् । उनका अनुसार प्रतियोगितामा पहिलो हुनेलाई नगद रु २५ हजार, दोश्रो हुनेलाई १५ हजार र तेश्रो हुनेलाई १० हजार नगद पुरस्कारको व्यवस्था रहेको छ ।
साथै चौथौ हुनेलाई आठ हजार, पाँंचौ हुनेलाई ६ हजार र छैठौंदेखि दशौंलाई पाँंच हजारको दरले नगद पुरस्कारको व्यवस्था रहेको छ । त्यस्तै विभिन्न विधाहरूअन्तर्गत भक्तपुर प्रथमलाई नगद रू.४ हजार, भक्तपुर दोस्रोलाई नगद रू.२ हजार, उत्कृष्ट भेट्रान्स प्रथम र द्वितीयलाई क्रमशः नगद रू. ४ हजार र २ हजार, उत्कृष्ट १२ वर्ष मुनि र १६ वर्ष मुनिका जुनियर खेलाडीलाई ३–३ हजार, उत्कृष्ट दुई महिला खेलाडीलाई क्रमशः ४ हजार र २ हजारका दरले र उत्कृष्ट २ अनरेटेड खेलाडीलाई पनि क्रमशः ४ हजार र २ हजार नगद पुरस्कारको व्यवस्था गरिएको छ ।
