काठमाडौं, वैशाख ९ । सरकारले हरियो नम्बर प्लेट भएका सवारी साधनलाई पर्यटकमैत्री बनाउने कार्यविधि बनाउन लागेको छ ।
संस्कृति, पर्यटन तथा नागरिक उड्डयनमन्त्री सुदन किरातीका अनुसार मन्त्रालयले मन्त्रालयको पर्यटन महाशाखा प्रमुखको संयोजकत्वमा कार्यविधि मस्यौदा समिति गठन गरेको हो । पर्यटकीय सवारी सञ्चालन तथा व्यवस्थापन कार्यविधि २०८० बनाएर पर्यटकीय सवारी साधनको व्यवस्थापन गर्ने मन्त्रालयको अवधारणा रहेको छ ।
समितिमा यातायात व्यवस्था विभागका निर्देशक, यातायात व्यवस्था कार्यालय साना–ठूला सवारी साधनका प्रमुख, एकान्तकुना, काठमाडौं, प्रहरी उपरीक्षक, काठमाडौं उपत्यका ट्राफिक प्रहरी कार्यालय काठमाडौं, नेपाल पर्यटन बोर्डका निर्देशक सदस्य रहनेछन् ।
त्यसैगरी त्रिभुवन अन्तर्राष्ट्रिय विमानस्थलका निर्देशक, नेपाल पर्यटक यातायात व्यवसायी संघका अध्यक्ष, नेपाल पर्यटक बस संघका अध्यक्ष, पर्यटन विभागका निर्देशक, एयरपोर्ट एयर यात्रु यातायात सेवा लिमिटेडका अध्यक्षसमेत सदस्य रहनेछन् । पर्यटन मन्त्रालयको पर्यटन प्रवद्र्धन शाखाका उपसचिवले सदस्य सचिवको भूमिका निर्वाह गर्नेछन् ।
Published Date: 22 April 2023
