काठमाडौं, वैशाख ८ । ऊर्जा, जलस्रोत तथा सिँचाइमन्त्री शक्तिबहादुर बस्नेतले राष्ट्रिय प्रसारण लाइनमा नजोडिएका गाउँमा नवीकरणीय ऊर्जा प्रविधिमार्फत वैकल्पिक ऊर्जाको पहुँच विस्तार गर्न निजी क्षेत्रको भूमिका महत्वपूर्ण रहेको बताएको छ ।
नेपाल नवीकरणीय ऊर्जा महासंघका अध्यक्ष गुणराज ढकालको नेतृत्वमा गएको टोलीसँग आज भएको भेटमा मन्त्री बस्नेतले नवीकरणीय ऊर्जा प्रविधिको विकास र प्रवर्द्धनका लागि निजी क्षेत्रसँग सहकार्य गर्न सरकार इच्छुक रहेको बताए ।
मन्त्री बस्नेतले परिसंघले भारतको सौर्य ऊर्जा विकास निगमसँग अनुभव आदानप्रदान र सहकार्यका लागि दुवै पक्षलाई फाइदा पुग्ने गरी सम्झौता गरेकोमा खुसी व्यक्त गरे ।
त्यसैगरी महासंघको भ्रमण टोलीले साना तथा मझौला उद्योगका साथै कृषि क्षेत्रका लागि नवीकरणीय ऊर्जा प्रविधिलाई प्राथमिकता दिन सरकारलाई आग्रह गरेको छ ।
उनीहरुले देशमा उपलब्ध सीप र पूँजीलाई परिचालन गरी नवीकरणीय ऊर्जा प्रविधिको विकास र सदुपयोग गरी ग्रामीण जनजीवनलाई सामाजिक र आर्थिक रूपमा उकास्न मन्त्रीको ध्यानाकर्षण गराए ।
साथै, टोलीले संघीय सरकारले निजी क्षेत्रमैत्री र उपभोक्तालाई अत्यन्त लाभदायी हुने कार्यक्रमहरू तर्जुमा गर्नुपर्नेमा जोड दिएको छ ।
उनीहरुले मिश्रित ऊर्जाको अवधारणालाई प्राथमिकता दिन पनि मन्त्रीलाई आग्रह गरेका छन् ।
